वल्र्ड नेवाः अर्गनाईजेशन, नेपाः च्याप्टरया ग्वसालय् नेवाः पहिचानया थीथी आयाम विषय राष्ट्रिय गोष्ठी क्वचागु दु ।

गोष्ठीया उलेज्या संघीया मामिला तथा सामान्य प्रशासन मन्त्रीं राजेन्द्र श्रेष्ठ यानादिगु खः। उगु ज्याझ्वलय् पुलाम्ह येँ महानगरपालिकाया मेयर बिद्यासुन्दर शाक्य व नेपाः च्याप्टरया निवर्तमान अध्यक्ष शाक्य सुरेनयात सम्मान याउगु खः।

गोष्ठीया न्हापागु सत्रय् डा.मिलन शाक्यं नेवाः पहिचानया विविध आयाम विषय मू न्वचु तयादीगु खः। अथेहे ज्याझ्वःया कजि पुष्कर माथेमा, नेवाः देय दबूया अध्यक्ष पबित्र बज्रचार्य, वल्र्ड नेवाः अर्गनाईजेशनया महासचि समन्त बज्रचार्य, व नेवाः पत्रकार राष्ट्रिय दबूया बरिष्ठ उपाध्यक्ष नृपेन्द्रलाल श्रेष्ठ व लोचनतारा मानन्धरं ज्याझ्वः न्ववानादीगु खः।

गोष्ठीया न्हापागु सत्रयया अध्यक्षता प्रा डा ओमकारेश्वर श्रेष्ठं यानादीगु उगु ज्याझ्वलय् नेवाः डा.चुन्दा बज्राचार्य नेपाःया शिक्षाप्रणालीइ नेपालभाषा, वरिष्ठ पत्रकार सुरेशकिरण मानन्धर नेवाः मिडिया व शरद कसाः न नेपाल लिपिया बारे कार्यपत्र न्ह्यब्बगु खः। निगुगु सत्रया अध्यक्षता डा.बिजय सैजु यानादीगुलि किरण केन रञ्जितं विश्वय् नेवाः, प्रेमराज शिल्पकारंण् पहिचानया लागि जुयाच्वंगु आन्दोलन व श्याम मानन्धरं नेपाल संवत् व शंखधर साख्वाया विषयय् कार्यपत्र न्ह्यब्बगु खः।

स्वगु सत्रय् जुगु ज्याझ्वःया अध्यक्षता डा. राजनलाल जोशीया अध्यक्षताय् नेवाः अमूर्त संस्कृति अन्तर्गत पत्रकार रत्न मनं येँया पून्हि, विराजकाजी राजोपाध्याय न ख्येँय् संगः व त्रिरत्न मानन्धरं दाफा यात कयाः कार्यपत्र न्ह्यगु खः। प्यगु सत्रय् जितेन्द्र बिलास बज्राचार्यं नेवाः संस्कृति गणेद्यः, शोभा श्रेष्ठं हाकुपटासी, वरिष्ठ पत्रकार पुष्करभक्त माथेमां नेवाः पहिचानय् अतिक्रमण विषय कार्यपत्र न्ह्यब्वगु खःसा उगु ज्याझ्वःया अध्यक्षता प्रा डा पुंरुषोत्तम श्रेष्ठ यानादीगु खः।

अथेहे लिपागु ज्याझ्वलय् संस्कृति मन्त्री जिवनराम श्रेष्ठं दिं लोककवि राजभाई जकःमि संकलन यानादीगु नेवाः पुर्खा विषय सचित्र सफू लोकापर्ण यानादीगु खः। ज्याझ्वःया सभाध्यक्षता नेपाः च्याप्टरया अध्यक्ष सुरेन्द्रभक्त श्रेष्ठ यानादीगु खः। नेपाः च्याप्टरया अध्यक्ष श्रेष्ठं नेपाल भाषा व संस्कृति नाप समसामयिक विषययात कया जनमत दयकेगु आजु तयाः थुगु गोष्ठी यानाःगु खँ धयादीगु खः।

Categorized in राष्ट्रिय