मदुगु झिंप्यदँ लिपा इतिहासविद् गोवर्धन शर्माया सफू पिदन
लहनान्यूज सम्वाददाता | ने.सं. ११४२ तछलागा षष्ठी (२०७९ असार ५) आइतबाः
![](https://www.lahananews.com/sites/default/files/gobardhan.jpg)
मदुगु झिंप्यदँ लिपा मदुम्ह इतिहासविद् सह प्राध्यापक गोवर्धन शर्माया सफू पिदंगु दु । वंगु शुक्रबाः येँय् जूगु छगू ज्याझ्वलय् मदुम्ह सह प्राध्यापक शर्माया समालोचना सफू ‘उपन्यासया चाकलय् गिरिजा’ पितब्वज्या जुल ।
ज्याझ्वलय् समालोचक पूर्णकाजी ताम्राकारलिसें नेवाः देय् दबूया नायः पवित्र बज्राचार्य, ईल्वहँ पब्लिकेशनया प्रवन्ध निर्देशक नरेशबीर शाक्यलिसें नं मंकाः कथं सफूया विमोचन यानादिल । राजोपाध्याय समाजया ग्वसालय् जूगु ज्याझ्वःया वक्तातय्सं नेपालभाषाया साहित्य क्षेत्रय् समालोचना विधां व्यापकता काय् मफूगुलिइ चिन्ता प्वंकूगु खः ।
समालोचनायात सुझावया रुपय् मकाःसे आलोचनाया रुपय् कायेगु प्रवृत्तीया हुनिं थ्व विधाया विकास जुइमफूगु बिचाः वक्तातयसं तःगु खः ।
ज्याझ्वलय् न्ववानादीपिं देय् दबूया नायः बज्राचार्य, नेवाः जातिय महासंघया नायः मनोज नेवाः खड्गी, ईल्वहँ पब्लिकेशनया प्रवन्ध निर्देशकलिसें वरिष्ठ पत्रकार शाक्य, समालोचक ताम्राकारलिसें नं महाकवि गिरिजा प्रसाद जोशीया व्यक्तित्वया चर्चालिसें गोवर्धनया समालोचकिय गुणया चर्चा यानादीगु खः ।
अथे हे, गोवर्धन शर्माया तःधिकःम्ह काय् सुभाष शर्मां थः अबुजुया व्यक्तित्वयात कयाः जः ह्वलादिसा राजोपाध्याय समाजया निवर्तमान नायः वदन ज्वालानन्द राजोपाध्याय व नायः संजय शर्मा राजोपाध्यायं समाजया उद्देश्य व यानावःगु ज्याखँया बारे जानकारी बियादीगु खः ।
पितब्वज्या जूगु सफुतिइ नेपालभाषा साहित्य क्षेत्रया महाकवि गिरिजा प्रसाद जोशीया उपन्यासया मदुम्ह इतिहासविद् सह प्राध्यापक शर्मां समालोचना यानादीगु दु । राजोपाध्याय समाजं पिथंगु सफूया मू ३५०/– तका तयातःगु दु ।
थुगु हे ज्याझ्वलय् कोरोना महामारीया इलय् संक्रमितया उपचारय् खटेजूपिं राजोपाध्याय स्वास्थ्यकर्मीत व २०७६ र ७७ सालमा एस.ई.ई परिक्षा पास जूपिं राजोपाध्याय विद्यार्थीतयत सम्मान नं याःगु खः ।
समाजं सफू पितब्वज्याया नापं सफू ब्वज्या नं याःगु खः । ब्वज्याय् वेद, तन्त्र, नेपालया धर्म, संस्कार, संस्कृतिया नापं ख्यःलिसे सम्वन्धित सफूत तःगु खः ।
Categorized in राष्ट्रिय