यल महानगरय् मेयरय् चिरिबाबु व उपमेयरय् मन्जली शाक्य निर्वाचित
लहनान्युज | बछलागा दशमी ११४२, जेष्ठ ११ बुधवाः
![](https://www.lahananews.com/sites/default/files/yala-chi.jpg)
यल महानगरपालिकाय् चिरिबाबु महर्जन मेयरय् हाकन निर्वाचित जुगु दु। नेपाली कांग्रेसपाखे उम्मेदवार जुयादीम्ह महर्जनं ४२ हजार ७२२ मत हया निर्वाचत जुयादीगु खः।
वयकलं नेकपा एमालेया हरिकृष्ण ब्यञ्जनकारयात १८ हजार १६२ मत स्वया अप्पो मत हःगु खः। ब्यन्जनकारं २४ हजार ५६० मत हःगु खः।
अथेहे राप्रपाया अष्ट महर्जनं ५हजार ५५४ मत हःगु खः। अथेहे यल महानगरय् उपमेयरय् नेकपा एमालेया मन्जली शाक्य निर्वाचित जुगु दु। वयकलं २५ हजार ८४ मत हःया निर्वाचित जुगु खः।
वयकःया निकटतम् प्रतिस्पर्धी नेकपा माओवादी केन्द्रया बाबुराज बज्राचार्य न १८ हजार ७५२ मत हःगु खः। बज्राचार्य गठबन्धनपाखे उपमेयरया उम्मेदवार जुगु खः। राप्रपाया स्वर्णिमा शाक्यं ७ हजार ७७८ व स्वतन्त्र उम्मेदवार अजरमान जोशीें ७ हजार २९ मत हःगु खः।
२९ गु वडा दुगु यल महानगरय् ४, ६, ७, ८, ९, १०, ११, १४, १६, २० व २८ वडा नाप ११ गु वडाय् अध्यक्षपि नेपाली कांग्रेस त्याउगु दु। वडा ५, १२, १५, १७, १८, १९, २२, २३, २४, २५, २९ याना झीछगु नेकपा एमाले विजयी जुगु दु।
अथेहे २१, २६ व २७ स्वंगु वडाय् नेकपा माओबादी केन्द्र व वडा नम्बर १ व १३ य् स्वतन्त्र उम्मेदवारपि त्याउगु खःसा वडा नम्बर २ व ३ य् एकीकृत समाजवादीं त्याकूगु खः।
Categorized in राष्ट्रिय