सम्पदालिसेया दिव्य भ्रमण सोमवाः क्वचाइगु
राजेश बज्राचार्य | ने.सं. ११३८ सिल्लाथ्व एकादशी (२७ जनवरी, २०१७)
![](https://www.lahananews.com/sites/default/files/27484522_10159890042360501_1494266114_o.jpg)
‘एक दिव्य भ्रमणः विगतसँगका भेटहरु’ शिर्षकय् लुम्बिनी बौद्ध विश्व बिद्यालय, डेनमार्कया आह्रुस युनिभर्सिटी व मोज्गार्ड म्यूजियमलिसेया सहकार्यं न्ह्यानाच्वंगु झिन्यान्हुया सम्पदा सचेतना सम्बन्धित किपा ब्वःज्या ज्याझ्वः सोमवाः क्वचाइगु जूगु दु ।
वंगु पुष २८ गते पाटन संग्रहालयसं स्वन्हूयंकया प्रदर्शनीपाखें न्ह्याःगु यात्रा लुम्बिनी विश्व विद्यालयका उपकूलपति नरेश बज्राचार्यं उलेज्या यानादिगु खः । लिपा प्रदर्शनी यलया नागबहाः, येँया इटुम्बहालय्, ख्वपःया द हेरिटेज ग्यालरीलिपा हाकन यलया ज्यापू समाज भवनय् थुगु प्रदर्शनीयात निरन्तरता बिइगु ज्याः जूगु समाजया न्वकू एवं संग्रहालय व्यवस्थापनया अध्ययेता शान्तमान महर्जनं जानकारी बियादिल ।
लुम्विनी विश्वबिद्यालयया स्नातक तह अन्तर्गत संग्रहालय अध्ययन विषयया न्हापाँगु ब्याचया ब्वनामि जुयादिम्ह भाजु महर्जनया धापूकथं थुगु प्रदर्शनीइ संलग्न निकाय, डेनमार्कया पुरातत्वविदयागु संग्रह व थौकन्हेया संग्रहालय अध्ययन नापं सम्पदा संरक्षणयानितिं न्ह्याइगु सचेतना अभियानया दृष्टिकोणं नं थुकियात अन्तर्राष्टिय स्तरया प्रदर्शनीकथं कायेछिं ।
‘वंगु ६०दँ निसें न्ह्यानाच्वंगु उपत्यकाया भौतिक विकासदुने सम्पदाया महत्व व भविष्यया संरक्षणपाखे खनेदैच्वंगु चुनौतीयात स्वयेगु दृष्टिकोण थपू यायेत नं थुगु प्रदर्शनीें तधंगु भूमिका म्हितेफु ।’ महर्जनं धयादि, ‘थुगु फोटो प्रदर्शनीदुने सुलाच्वंगु तथ्यपाखें भावी पुस्तां झीगु सम्पदायात गथे ल्यंकेगु वा पर्यटकीय दृष्टिकोणं स्थानीय संस्कृति व सम्पदायात जीवन्त संग्रहालयया स्वरुप गुकथं बिइफै धैगु गम्भीर न्ह्यःसपाखे ध्यान सालेगु कुतः जुवंगु दु ।’
![](http://www.lahananews.com/sites/default/files/pictures/27393455_10159890041875501_1265724165_o.jpg)
थौकन्हेया भौतिक परिवेशय् सम्बन्धित समुदायपाखें नृवंश विज्ञानय् जुइगु अमूल्य अवशेष संग्रहया अभ्यासयात गुकथं मूल्याकंन याइ धैगु खँया अध्ययन नं थुगु परियोजनाया लक्ष्य जूगु मोज्गार्ड म्यूजियमया क्यूरेटर एवं डेनमार्कय् थुगु विषयसं विद्यावारिधी यानाच्वनादीम्ह उर्लिक जोन्सनं धयादिल ।
‘सन १९५०य् नेपाल पर्यटकपिनित खुला जुइधुंका १९५७ निसें १९७९ तक नेपालय् विशेष ध्यान तयादिम्ह डेनमार्कया पुरातत्वविद वेर्नेर याकोब्सनयागु संग्रहयात नेपाली स्वकुमिदथुइ क्यनेगु कुतः यानागु खःं ।’ जोन्सनं धयादिल, ‘डेनमार्कया म्यूजियमय् हलिन्यंकया ५०द्वः मल्याक्क दुगु संग्रहमध्ये पुरातत्वविद स्वर्गीय वेर्नेरया जक ८८गू सामग्री संग्रहित जुयाच्वंगु दु । थुपिंमध्ये १९गू सामग्रीया किपा व स्वनिगःया पुलाँगु किपातः नापं थौकन्हेया अवस्था तुलना यायेकथं किपातः संग्रह याना प्रदर्शनीइ दुथ्याकागु दु ।’
स्वर्गीय वेर्नेरं संग्रह यानाथकुगु सामग्री हे प्रदर्शनीइ छाय् तये मफुत धैगु न्ह्यसःलय् जोन्सनं धयादिल, ‘डनमार्कं सामाग्री हे हयेगु कुतः जूगु खः तर प्रदर्शनीलिपा थुपिं सामग्री सुरक्षित याना लितेयंकेगु शर्त दुगु जुल । थुखेर नेपाल सरकारया नियमकथं थुजोगु पुलाँगु सामग्री लितेयंकेमज्यूगु नापं उकीया संरक्षण जिम्मा सुना कायेगु यकीन मजुसेंलि किपात जक प्रदर्शन यायेगु जुवंगु खः ।’
परियोजना अन्तर्गत किपा ब्वःज्यानापं पुरातात्विक महत्वया सम्पदा सामग्रीत गन संग्रहित यायेगु उचित जुइ धैगु विषयसं स्थानीयलिसे नं सहलह ज्याझ्वः जूगु वयेकलं कनादिल । ब्वःज्याय् थ्यंपिंमध्ये करीव न्यासः मनूतसें ब्यूगु प्रतिक्रिया सर्र्वक्षणय् संचित यायेगुनापं करीव ५०म्हेसिनं सहलहसं ब्वति काःगु वयेकलं जानकारी बियादिल ।
‘सहलहसं ब्वतिकापिं सकसिनं थुपिं संग्रहित सामग्रीया थौंतक नं विशेष महत्व दुगु धाःगु दु । थुपिं सामग्री नेपालय् हे लितहयेमा वा डेनमार्कया संग्रहालयसं हे थुकिया उचित संरक्षण जुइ धैगु धापू नं वःगु खनेदु ।’ जोन्सनं धैदिल ।
सोमवाः नेपाल पर्यटन बोर्डया हलय् बिस्कंया ज्याझ्वः याना थुगु किपा ब्वःज्या क्वचाई । प्रदर्शनी अवलोकनकर्ता व सहलहपाखें दुथ्यागु खँ नापं अध्ययनया निष्कर्ष न्ह्यब्वयेगुलिसें वरिष्ठ पत्रकार कनकमणि दिक्षित, लुम्बिनी विश्वबिद्यालय लगायतया विशिष्ट व्यक्तित्वपिनिगु धापू न्यनेगु याना थुगु प्रदर्शनीया समापन जूइगु धाःगु दु ।
Categorized in राष्ट्रिय