जि त्यानावय्काः वडाय् शिक्षा, स्वास्थ्य, संस्कृतिया विकास याय्गुलिसें लजगाःया ह्वःताः नं दय्कावनेगु योजना दु ।

जिगु एजेन्डा पूवंकेत भिजन व प्लान माः । व भिजन अले प्लान जिके दु । थःगु छेँ थम्हं दयेके, थःगु वडा थम्हं दय्के धइगु अवधारणा ज्वनाः ज्या यानावनेगु खः ।

वडाया छुं नं विकास निर्माणया ज्याय् स्थानियलिसे सहकार्य, समन्वय, योजनावद्ध खाका दय्काः न्ह्याःवनेगु जुइ । थुकिं वडाबासीयात वडाया हरेक ज्याय् अपनत्व दइ व थ्व हे भावना वडाया विकासया लागिं तिबः जुइ । सुन्दर सफा वडा, स्वस्थ वडा, शिक्षित वडा, सांस्कृतिक सम्पदा, मूर्त तथा अमूर्त सम्पदाया संरक्षण, सम्वद्र्धन अले प्रवद्र्धन व सुरक्षित वडा स्थापना याय्गु जिगु मू आज्जु खः।

वडालयात व्यवस्थित दय्केत व सिस्टमय् यंकेतलिसें आइटी टेक्नालोजि कथं कामकाजी व ल्याय्म्ह नं न्ह्यःने यंकेगु कथंया ज्याझ्वःत हय्गु जुइ।

ल्वहँहिति, तुं आदि थुज्वःगु लःया श्रोतया संरक्षण, ल्याय्म्ह, मिसातय्त सीपमूलक तालीम बियाः स्वरोजगारया लकस दय्केगु, एक व्यक्ति एक रोजगारया व्यवस्थालिसें साना अले घरेलु उद्योगयात आधुनिकीकरण अले व्यवस्थित यासें वडा दुने हे व्यापार व्यवसाय न्ह्याकेगु लकस दय्के।

कंगय् च्वंगु स्वास्थ्य भवनयात विशेषज्ञ चिकित्सक तयाः सामुदायिक अस्पतालया रुपं विकास याय्गुलिसेंया योजना जिं दय्कागु दु।

Categorized in राष्ट्रिय