यल मपा १६ वडा, नेकपा एमालेपाखें वडाध्यक्षया उम्मेदवार १ यल महानगरपालिका दुने लाःगु नीच्यागू वडामध्ये वडा नं १६ या बिस्कं महत्व व विशेषता दु।

महानगरया २८ वडातमध्ये न्यागू वडात छसिकथं ८, १९, १२. १८ व २० वडात संधियारया रूपं दु । थुगु वडा दुने तःधंगु चीधंगु यानाः १४० साझा सार्वजनिक चुक, ८० सार्वजनिक तुं, २५ गल्ली लँ, १० मूलसडक लँ, २२ बौद्ध विहार व मठमन्दिर दु । विश्व प्रशिद्ध देगःत गथेकि हिरण्यवर्ण महाविहार, कृष्ण मन्दिर, विश्वकर्मा मन्दिर व विश्व सम्पदा धलखय् दुज्याःगु यल दरबार क्षेत्रया ५० प्रतिशत थ्व हे वडाअन्तर्गत लाः।

मूर्त अमूर्त संस्कृतिया तःमि थुगु वडायात विकास यानाः वडावासीया लजगाः व समृद्धिइ तिबः बीगु ह्वःताः कथं जिं थ्व स्थानीय तह निर्वाचन २०७९ यात कयाच्वनागु दु ।

सुशासन, पारदर्शिता, सहभागितामूलक विकास व सकतां कथंया विकासया लागिं जिं थ्व स्थानीय तह २०७९ निर्वाचनय् उम्मेदवारी बियागु खः । जि खँ ल्हाय्त मखु, ज्या याय्त वयागु दु । जिं निर्वाचन प्रचारया झ्वलय् गुलि नं प्रतिवद्धता सार्वजनिक यानागु दु, व दक्वं पूवंकेगु कथं न्ह्यःने वनेगु जुइ, सक्रिय जुइगु जुइ ।

सांस्कृतिक रुपं तःमि वडाया मूर्त अमूर्त संस्कृति, सम्पदाया संरक्षण, सम्वद्र्धन व प्रवद्र्धन अले विकास यासें पर्यटन ख्यःया विकास यानावनेगु कथं ज्या याय्गु ग्वसाः दु । थुकिं वडाबासीया आर्थिक स्तर थकाय्त तकं तःधंगु तिबः जुइ।

अथे हे, जनताया माग व आवश्यकताया लिधंसाय् प्राथमिकीकरण यासें योजना दय्काः ज्या याय्गु जुइ । स्वच्छ, सफा, हराभरा वडा कथं विकास याय्त जिं योजना दय्कागु दु।

Categorized in राष्ट्रिय