यलय् उद्योग, व्यवसायलिसें सामाजिक गतिविधिइ लोकंह्वाःम्ह अजरमान जोशीं यल महानगरपालिकाया उपमेयर पदय् स्वतन्त्र उम्मेदवारी ब्यूगु दु ।

निर्वाचन अधिकृतया ज्याकुथिं वंगु शनिबाः वय्कःयात खराःचा चुनाव चिं ब्यूगु दु । न्ह्याबलें न्यासि वने हे यःम्ह जोशी आः चुनावी लिच्वः थःगु पक्षय् लाकेत खराःचा थें ब्वाँय् जुयाच्वंगु दु ।महानगरपालिकाया मेयरय् नेपाली काँग्रेस व उपमेयरय् नेकपा (माओवादी) केन्द्र दथुइ गठबन्धन जूगु स्थितिइ जनताया दथुइ लोकंह्वाःम्ह, बांलाःगु सम्पर्क सञ्जाल दुम्ह सामाजिक व्यक्तित्वया उम्मेदवारीं थीथी राजनीतिक दलया उपमेयरया उम्मेदवारयात बांलाःगु टक्कर ब्यूगु दु।

उपमेयरय् नेकपा माओवादी (केन्द्र) पाखें बाबुराज बज्राचार्य, एमालें मञ्जली (आस्था) शाक्य, राप्रपां स्वर्णीमा शाक्यं उम्मेदवारी बियादीगु दु । ‘दलतय् दथुइ नितान्त गुट, वैयक्तिक व सत्ता स्वार्थको राजनीतिं जनता निराश जुयाच्वंबलय् जनताया सेवक कथं प्रमाणित मनुखं उम्मेदवारी ब्यूबलय् जिपिं लय्ताः’ ललितपुर उद्योग वाणिज्य संघया पूर्व अध्यक्ष सविन श्रेष्ठया धापू खः।

२०४९ निसें २०७४ सालतक्क ललितपुर उद्योग वाणिज्य संघय् सक्रिय जोशी संघया २०६८ व २०७० निक्वः अध्यक्षय् निर्वाचित जूगु खः। अथे हे, प्रहरी व प्रशासनयात जनमैत्री, जवाफदेही व उत्तरदायी दय्केगु ज्याझ्वलय् जोशीया संयोजनकारी भूमिका दु । जोशीया हे अगुवाईलय् महानगरीय प्रहरी प्रभाग मंगलबजारया भवन दय्कूगु खः।

२०६९ फागुणय् ललितपुर महोत्सव, पाटन दरबार क्षेत्रय् १३ सिसिटीभी तय्गु ज्या, २०७२ सालया भुखाय् लिपा राहत वितरण, भुखाचं क्षतिग्रस्त सम्पदा संरक्षण व पुनर्निर्माणया ज्याय् जोशीया योगदान आम सर्वसाधारणं लुमंकातःगु दु । जोशीं नागरिक मैत्री प्रहरी प्रशासनया अभियान, श्री शान्ति विद्यालयया व्यवस्थापन समितिया नायः जुयाः नं ज्या यानादिल।

थौंकन्हय् वय्कः नख्खुइ दय्काच्वंगु मंगलमार्ग अन्तर्राष्ट्रिय बौद्ध ध्यान केन्द्रया दय्केज्याय् क्रियाशील दु ।‘नागरिक समाज, आम उद्यमी व्यवसायी, सर्वसाधारण जनतालिसें राजनीतिक दलय् इमान्दार कार्यकर्तात नं पार्टी दुनेया गतिविधि, नेता विशेष, गुट विशेषया ज्यां वाक्क जूगु इलय् राजनीतिप्रति भरोसा व विश्वास थनेगु ज्या अपरिहार्य जूगु दु। अथे जुयाः जिं उम्मेदवारी बियागु खः’ जोशीया धापू खः।

Categorized in राष्ट्रिय