हरेक वडाय् छुं नं छुं समस्या दया हे च्वनी, समस्या हे मदुगु वडा धइगु हे दइमखु, समस्या न्ह्याबलें दयाच्वनी । उकियात समाधान याना वनेगु हे मुख्य खँ खः । अथे खयाः नं वडाय् खने दुगु मुख्य समस्या धइगु ला धःया उचित व्यवस्थापन, त्वनेगु लःया आपूर्ति, सतकया समस्या, वडाया कार्यक्षेत्रया खुसिया सुचुकुचु, वडावासीया उचित तथ्यांक संकलन, विपद् व्यवस्थापन याय्गु खः । 

 

अथे हे वडावासीया स्वास्थ्यया समुचित परीक्षणया व्यवस्था, सतक मस्त, फुटपाथया व्यवस्थापन नं याय्माःगु दुसा वडाय् शान्ति सुरक्षा कायम याय्माःगु चुनौति नं दु । अथे हे लागू वासःया दुरुपयोग नं उतिकं जुयाच्वंगु दुसा आः निर्वाचित जुल धाःसा मुख्यकथं खनेदुगु थ्व समस्या समाधानया निंतिं कुतः याना वनेगु जुइ ।

 

थ्व स्वयां न्ह्यःया कार्यकालय् गुलि नं ज्या यानाः उकिं जिं वडावासीया मन त्याके फुगु खना । वडावासीपिंसं न्हापा गुगु विश्वास यानाः जितः वडाअध्यक्षय् निर्वाचित यानादिल । वय्कःपिनिगु विश्वासयात जिं त्याके फुगु तायेका । वडावासीया मन त्याकाः गुगु ज्या जिं यानाः उकिया हे लिधंसाय् हाकनं छक्वः वडावासीया सेवा याय्गु ह्वःताः बियादी धइगु जितः विश्वास दु । लिसें न्हापा गुकथं वडावासीया मन त्याकाः ज्या यानाः व स्वयां अप्वः आः यायेगु नापं न्हापा याय् मफुगु ज्या न्ह्याकेगु जुइ ।

निर्वाचित जुइवं दकलय् न्हापां थ्व ज्या याये धकाः प्राथमिकता बियागु मदु । 

 

ज्याया आवश्यकता स्वयाः उकियात प्राथमिकता बिया वनेगु जुइ । छु आवश्यक खः, गुगु महत्वपूर्ण जू, वडावासीया निंतिं आवश्यक जुइगु योजनायात प्राथमिकता बियाः ज्या याना वनेगु जुइ । अथे खःसां वइगु न्यादँया निंतिं धकाः छगू कार्ययोजना नं दय्कागु दु । आवश्यकताया लिधंसाय् प्राथमिकता बियाः ज्या यायेगु योजना दु । 

 

नकतिनि जक क्वचाःगु जिगु न्हापांगु कार्यकालय् कोरोना भाइरसया संक्रमण न्यना वंगु व उकिया रोकथामया निंतिं तयातःगु लकडाउनया इलय् ताःलाक्क हे वडावासीयात सेवा बियागु दु । कोरोना संक्रमित जूपिंत आवश्यक उपचारया व्यवस्था यानाः इमिगु जीवन बचे याय् खना सन्तुष्ट जू । कोरोनाया कारणं स्वास्थ्योपचारया समस्या जूपिंत आवश्यकता व प्राथमिकता बियाः सेवा बी फुगु हे तःधंगु सन्तुष्टि खः । 

 

अथे हे विपन्न वर्गयात इमिगु आवश्यकताकथं पारिश्रमिक इनेगु, अति आवश्यक थासय् मर्मत, पुनःनिर्माण आदि ज्या जुल । थुकी जि सन्तुष्ट हे जुया । समग्रय् न्यादँया दुने गुलि नं ज्या जुल, उकी सन्तुष्ट हे दु । उकिसनं यानागु ज्या न्यादँया दुने सम्पन्न याय् खंगु हे तःधंगु सन्तुष्टि खः । 

 

स्थानीय भाषा, कला, संस्कृतिया उत्थानया निंतिं न्हापा नं यानागु हे खः । आः नं याय्गु जुइ । न्हापा याय् धुन आः थ्व ख्यलय् छुं याय्म्वाःल धइगु जुइमखु । थ्व झीगु म्हसीका खः थुकिया निंतिं न्ह्याबलें न्ह्यचिला च्वनेगु जुइ । भाषा, कला, संस्कृतिया उत्थानया निंतिं वइगु दिनय् गृहिणी, मिसा, ज्येष्ठ नागरिक जक मखु, आः विद्यार्थीलिसें त्वाः त्वालय्, थीथी क्लब, संघसंस्थायात नं आवश्यक कथं शिक्षण व प्रशिक्षणया व्यवस्था याना वनेगु जुइ ।

 

येँ महानगरपालिका १७ वडाय् न्ह्यानाच्वंगु छत्रपाटी निःशुल्क चिकित्सालययात अझ सुदृढरुपं न्ह्यज्याकेगु निंतिं नं जिं फक्व ग्वाहालि यायेगु जुइ । वडापाखें थुगु अस्पतालय् जेष्ठ नागरिक व असहायपिनि निःशुल्क उपचारया व्यवस्था याय्त छगू करोडया कोष हे खडा याना बीगु योजना नं दय्का तयागु दु ।