लिपि गुथिया न्हुगु नेतृत्वय् अनिल स्थापित
लहनान्युज | चौलागा अष्टमी ११४२, बैसाख ११ आईतवाः
![](https://www.lahananews.com/sites/default/files/Untitled-1_23.jpg)
नेपाल लिपि गुथिया झिंच्याक्वःगु तःमुँज्यां अनिल स्थापितया नेतृत्वय् न्हय्म्हेसिगु न्हूगु ज्यासना पुचः सर्वसम्मत ल्यःगु दु।
उगु तःमुँज्या न्हूगु ज्यासना पुचलय् पूर्व नायः निरञ्जन ताम्राकार, पवित्र कसाः, कमलतारा तुलाधर, बिक्कि बज्राचार्य, प्रमिला ताम्राकार व अष्टमान महर्जन सर्वसम्मत जुगु खः।
न्हूम्ह नायः अनिल स्थापितं नेपाल लिपि गुथिं ४२ दँ तक नेपाल लिपि व रञ्जना लिपिया प्रवद्र्धनया ज्या न्हाकाः जनमानसय् प्रचार प्रसार व लोकंह्वाकेगु ज्या यानावयाच्वंगु न्ह्यथनादिसें आः नेपाल लिपिया प्राज्ञिक, अनुसन्धानात्मक, प्राविधिकया नापनापं व्यावसायिक गतिबिधिया निंतिं नं पलाः न्ह्याकेगु खँ कनादिल।
थुगु तःमुँज्या ज्याझ्वलय् छ्याञ्जे पवित्र कसाः न न्ह्यब्वःगु दच्छिया प्रगति प्रतिवेदन व न्वकू अनिल स्थापितं आर्थिक सभां पारित याःगु खः।
सभानायः एवं पुलांम्ह नायः निरञ्जन ताम्राकारं नेपाःया मौलिक नेपाल लिपि रञ्जना लिपिया नापनापं मेमेगु लिपिया प्रवद्र्धनया निंतिं संस्थागत कुतल सकलें जायेमाःगु व अझ युवापुस्ता विशेष अग्रसर जुइमाःगु न्ह्यथना दिल।
Categorized in राष्ट्रिय