स्थानीय तह निर्वाचनया लागि थौंनिसे उम्मेदवारपिनिगु मनोनयन प्रक्रिया शुरु जुइत्यःगु दु।

निर्वाचन आयोगं थौं ११ व कन्ह्य १२ वैशाखया लागि देयन्यक मुख्य निर्वाचन कार्यालय व निर्वाचन कार्यालय मनोनयनया तिथि क्वछिउगु खः।

थौं सुथय् १० बजेनिसे कन्ह्य ५ बजे तक निर्वाचन अधिकृतया कार्यालयय् उम्मेद्वार बिइत थःपिनिगु नां मनोनयन याये दइगु जुग दु। देयन्यकया ७५३ स्थानीय तहया प्रमुखनिसे वडा सदस्य पदया लागि दलगत व स्वतन्त्र रुपं मनोनयनपत्र दर्ता याइ।

७५३ मध्ये खुगु महानगरपालिका, ११ उपमहानगरपालिका, २७६ नगरपालिका व ४६० गाउँपालिका दु। उगु दक्को तहय् प्रमुख नाप मेयर व उपप्रमुख नाप उपमेयर पदया लागि मनोनयन जुइ।

अथेहे देयन्यक स्थानीय तहय् ६७४३ वडा दु। हरेक वडाया लागि छम्ह वडाध्यक्ष, निम्ह वडा सदस्य, छम्ह मिसा सदस्य व छम्ह दलित मिसा सदस्यया लागि मनोनयन दर्ता जुइ।

Categorized in राष्ट्रिय