राष्ट्रपति विद्यादेवी भण्डारीं येँ देय्या ऐतिहासिक सम्पदा मरु सतः (काष्ठमण्डप) या लोकार्पण यानादीगु दु।

थौं सोमवाः मरुइ जूगु छगू समारोहया दथुइ राष्ट्रपति भण्डारीं मरु सतः सर्वसाधारणया लागिं नं खुल्ला जूगु संकेत स्वरुप थुकिया उलेज्या यानादीगु खः । राष्ट्रपति विद्यादेवी भण्डारीं मरु सतःया मू लुखाय् तयातःगु सिजःपौ अनावरण यासें मरु सतःया लोकर्पण यानादीगु खः। लोकार्पणया लागिं काष्ठमण्डप पुनर्निर्माण समितिया अध्यक्ष नाप सांसद राजेश शाक्यं येँ मनपाया मेयर विद्यासुन्दर शाक्ययात मरु सतःया ताःचा लःल्हानादीगु खः।

वयां लिपा मेयर शाक्यं उगु ताःचा राष्ट्रपति भण्डारीयात लःल्हानादिलसा राष्ट्रपतिपाखें वहे ताःचापाखें लुखा चायेकाः सांकेतिक रुपं मरु सतः सकस्यां लागिं खुल्ला जूगु घोषणा यानादी खः । वयां लिपा राष्ट्रपति भण्डारीं मरु सतः येँ महानगरपालिकायात हस्तान्तरण याःगु संकेत स्वरुप उगु माःताःचा मेयर विद्यासुन्दर शाक्ययात लःल्हानादीगु खः । मरु सतः लोकार्पण ज्याझ्वः याये न्ह्यः जूगु समारोहयात सम्बोधन यासें

राष्ट्रपति भण्डारीं मरु सतः धस्वाःगु धइगु सम्पूर्ण राष्ट्रया लागिं हे लसताया खँ खः धयादिल । वय्कलं धयादिल, ‘थःगु हे स्रोत, साधन व सीप छ्यलाः मरु सतः दयेकूगु कारणं झीगु सम्पदा निर्माण व पुनर्निर्माण यायेत झी थः हे सक्षम खः धइगु खँ प्रमाणित जूगु दु ।’

वि.सं. २०७२ सालया तःभुखाय् लिपा नेपाःमित धइपिं न्ह्यागु हे दुःख व विपतया इलय् नं छधी छप्पँ जुयाः थःपिंत वःगु विपत समाधान यानाः न्ह्याः वनेफु धइगु खँ प्रमाणित जूगु दु धासें राष्ट्रपति भण्डारीं धयादिल, ‘उकिया दसि खः काष्ठमण्डपया पुनर्निर्माण ।’ मरु सतः पुनर्निर्माण सम्पन्न जूगु खँय् वय्कलं येँ महानगरपालिका, पुनर्निर्माण समिति व सकल महानगरवासीयात नं बधाई बियादिल।

अथे हे ज्याझ्वलय् सम्बोधन यासें येँ महानगरपालिकाया मेयर विद्यासुन्दर शाक्यं नेपाःया सम्पदा निर्माण यायेगु लागिं सुं नं विदेशीयाके ध्यबा काये माःगु आवश्यकता मदु, सम्पदा निर्माण यायेगु क्षमता व दक्षता झीके अझ नं दनि धइगु खँ मरु सतःया पुनर्निर्माणपाखें पुष्टि जूगु दु धयादिल ।

येँ महानगरपालिकाय् थःपिं निर्वाचित जुयाः वयेधुंकाः सम्पदा निर्माण व पुनर्निर्माणया ख्यलय् यक्व हे ज्या जूगु दु धासें वय्कलं न्हापा सम्पदा पुनर्निर्माण यायेगु लागिं उखेंथुखें ब्वाँय् जुइ माःथाय् थौंकन्हय् थःपिं हे जनताया छेँय् छेँय् वनाः गुथिछेँ, क्वाःपाःछेँ, द्यःछेँ, देगः, सतः, फल्चा दयेकेमाःसा जिमिसं दयेका बी धकाः धाः जुयाच्वनागु खँ कनादिल ।

अथे हे मरु सतः दुने तयातःगु गोरखनाथ व प्यम्ह गणेद्यःया मूर्ति न्हूगु तल धइगु बारे अदालतलिसे महानगरपालिकाया छुंहे विवाद मदुगु व अदालतं छु निर्णय यात वहे स्वीकार याये धकाः थःपिंसं धायेधुंकूगुलिं आः विषयय् अप्वः विवाद पिकया च्वनेमाःगु आवश्यकता मदुगु खँ नं मेयर शाक्यं स्पष्ट यानादिल । लसकुस न्वचु बीगु झ्वलय् काष्ठमण्डप पुनर्निर्माण समितिया नायः लिसें सांसद राजेश शाक्यं मरु सतः दयेकेगु लागिं येँ महानगरपालिकां सम्पूर्ण आर्थिक भार व्यहोरे याःगु जानकारी यासें समाजया आपालं विज्ञ, व्यक्ति एवं निकायया ग्वाहालि दयाः मरु सतः दयेकेत ताःलाःगु खः धयादिल ।

वय्कलं धयादिल, ‘केपी ओली प्रधानमन्त्री जुयादीगु इलय् तःभुखाचं क्षति जूगु मरु सतः, धरहरा व लानिपुखू तुरुन्त हे पुनर्निर्माण यायेमाः धकाः नीति दयेकूगु खः । जिमिसं काष्ठमण्डप दयेकाः उगु नीतियात नं सार्थक यानागु दु ।’ ज्याझ्वलय् सम्बोधन यासें पुरातत्व विभागया महानिर्देशक दामोदर गौतमं मरु सतः दुगु लागाय् इशापूर्व १०५० पाखे हे जंगल दुगु व अन कृषिया ज्या जुइधुंकूगु दुसा ईशापूर्व १० पाखे मानव वस्ती खने दयेधुंकूगु खँ कनादिल । लिसें वय्कलं मरु सतः विश्व सम्पदाय् लाःगु ‘क’ वर्गया सम्पदा खः धासें थ्व सतः सन् ६३५ निसें ६७० तकया दुने निर्माण जूगु प्रमाण लुया वःगु खँ नं कनादिल ।

अथे हे पुनर्निर्माण समितिया दुजः अरुणा नकर्मीं मरु सतः स्रोत, साधन व सीपया ल्याखं नं पूर्ण रुपं नेपाली सम्पदा खः धयादिल । समितिया सल्लाहकार प्रा.डा. प्रेमनाथ मास्कें नब्बे सालया भुखाचय् मरु सतः दुना मवं तर ०७२ सालया भुखाचय् पाःताः जुइक दुना वन, थ्व दुना वंगुया कारण थुकियात इलय् ब्यलय् मर्मत सम्भार मयाःगुलिं हे खः धासें आः झीसं इलय् ब्यलय् मर्मत यायेगु ज्यायात नं प्राथमिकता बीमाः धयादिल । उगु ज्याझ्वलय् मरु सतः पुनर्निर्माण यायेगु ज्याय्  ग्वाहालि याःपिं थीथी व्यक्तिपिंत हनापौ द्यछासें सम्मान यायेगु ज्या नं जूगु खः ।

Categorized in राष्ट्रिय