२०७२ सालया तःभुखाचं क्षतिग्रस्त जूगु येँया ऐतिहासिक मरु सतः पुनर्निर्माण लिपा छगु ज्याझ्वः दथुइ थौं राष्ट्रपति विद्यादेवी भण्डारीं थुकिया लोकार्पण यानादीगु ग्वसाः दु।

काष्ठमण्डप पुनर्निर्माण समितिं बिउगु जानकारी कथं थौं न्हिनसिया १ ताः इलय् राष्ट्रपति विद्यादेवी भण्डारीं थुकिया लोकार्पण यानादीगु ग्वसाः दु ।

येँ महानगरपालिकाया पहलय् गठन जूगु काष्ठमण्डप पुनर्निर्माण समितिपाखें मुक्कं स्वदँ व च्याला बिकाः थुकिया पुर्निर्माण सम्पन्न याःगु खः । पुनर्निर्माणया ज्या ताः ई न्ह्यः हे क्वचाःगु खःसां थीथी कारणं यानाः उलेज्या लिबानाच्वंगु खःसां राष्ट्रपतिपाखें ई प्राप्त जूगुलिं थौं हे थुकिया उलेज्या यायेत्यंगु खः ।

थौं उलेज्या जुइत्यंगु बारे म्हिगः पुनर्निर्माण समितिपाखें याःगु पत्रकार सम्मेलनय् न्ववासें समितिया नायः लिसें सांसद राजेश शाक्यं मरु सतः पुनर्निर्माण लिपा थुकिया उलेज्यायात ‘उद्घाटन’ मधासे ‘लोकार्पण’ खँग्वः छ्यलागु खँ कनादिल । मरु सतः सम्बन्धी किंवदन्तीकथं गबलय् तक चि व चिकंया भाः छगू हे जुइ मखु अबलय् तक मरु सतःया निर्माण पूर्ण जुइ मखु धइगु मान्यता दुगु जुयाः आः पुनर्निर्माण लिपा नं थ्व ज्या अझं अपूर्ण हे तिनि धइगु विश्वास कथं थुकियात उद्घाटन मयासे लोकार्पण यायेत्यनागु खँ वय्कलं कनादिल ।

अथे हे मरु सतःदुने पलिस्था याःगु गोरखनाथ व प्यम्ह गणेद्यःया मूर्ति पुलांगुया थासय् न्हूगु तल धकाः सर्वोच्च अदालतय् मुद्दा लानाच्वंगु बारे वय्कलं धयादिल, ‘थ्व मुद्दा काष्ठमण्डप बारे लाःगु मखु । थ्व मुद्दा मूर्तिया बारे जक खः । थुकियाबारे सर्वोच्च अदालतं भदौ ५ गते फैसला बीगु खँ दु ।

अबलय् सर्वोच्चपाखें छु फैसला वइ, वहे कथं ज्या याना वनेगु प्रतिवद्धता जिमिसं प्वंकागु दु ।’पुनर्निर्माण समितिया सचिव गौतम डंगोलं झीगु धार्मिक मान्यताय् स्यंगु मूर्ति पुजा याये मजिउ धइगु विश्वास दुगु जुयाः थीथी धार्मिक निकाय व विद्वानतय्गु रायकथं हे पुलांगु स्यंगु मूर्तिया थासय् न्हूगु तयागु जानकारी बियादिल ।

अथे खःसां पुरातात्विक मान्यताकथं पुलांगु मूर्तियात पुरातत्व विभागं हे सुरक्षित यानातःगु खँ नं वय्कलं कनादिल । थौं जुइगु लोकर्पण ज्याझ्वलय् राष्ट्रपति भण्डारीयात पुनर्निर्माण समितिपाखें मरु सतःया ताःचा लःल्हाइ । राष्ट्रपतिं रिबन चायेकाः दुने निरीक्षण यानादी । वयां लिपा ताःचा येँ महानगरपालिकाया मेयर विद्यासुन्दर शाक्ययात लःल्हानादी ।

थ्व धुंकाः मरु सतः येँ महानगरपालिकाया मातहत वइ । मरु सतःया पुनर्निर्माण येँ महानगरपालिकां उपलब्ध याःगु झिंछगूत्या करोड तकाया बजेटं हे निर्माण जूगु खः।

Categorized in राष्ट्रिय