खुशीबही स्वागतद्वारया उलेज्याः जुल
लहनान्युज | चिल्लागा त्रयोदशी ११४२, १६ बुधवाः
काठमाडौँ महानगरपालिका वडा नं १३ टंकेश्वर खुशीबहिलीई निर्माण जूगु खुशीबही स्वागतद्वारया म्हिगः उलेज्याः जुल।
बागमती प्रदेशया माननीय राजेश शाक्यया सांसद पूर्वाधार विकास कार्यक्रम अन्तर्गत नदी संगम महाविहार सर्वसंघ, खुशीबहीया सहकार्यय् उगु द्वार निर्माण जूगु खःसा उलेज्याः सांसद शाक्य व १३ नं वडाया वडाध्यक्ष धु्रबनारायण मानन्धरं मंकाः रुपं यानादिउगु खः।
उगु हे ज्याःझ्वलय् खुशीबहीया ऐतिहासिक व धार्मिक महत्व न्ह्यःब्वयेगु ताःतुना दयेका तःगु ‘खुशीबही’ वृत्तचित्रया नं लोकार्पण जूगु खः । खुशीबही स्वागतद्वार निर्माण उपभोक्ता समितिया नायः महेन्द्र रत्न शाक्यं उगु वृत्तचित्र तयार याना दिउगु खः।
ज्याः झ्वलय् न्ववासें सांसद शाक्य स्वनिगःया सम्पदा संरक्षण यायेगु थःपिनि मू आज्जु जूगु धाःसें येंया १८ गू बहाः व १६ गू बहीया बिस्कं बिस्कं सर्किट दयेकाः प्रवद्र्धन यायेमाःगु आवश्यकतायात ल्ह्वःना वयाच्वंनागु खँ कनादिल।
वडाध्यक्ष मानन्धरं सांसद पूर्वाधार विकास कोषपाखें १३ नं वडाय् आपालं विकास निर्माणया ज्याः न्ह्याःकेफूगु लसताया खँ खः धासें भिंगु ज्याः यायेबलय् पंगः वसां नं लिमचिलागु अनुभव कनादिल।
खुशीबही स्वागतद्वार निर्माण उपभोक्ता समितिया छ्यान्जे रविन्द्र शाक्यं खुशीबहीया नां व ऐतिहासिकताया सदाकालं ल्यंकातयेया लागि स्वागतद्वार दयेकेमाःगु खँ कनादिल। नापं वयकलं स्वागतद्वार निर्माणया ल्याःचाः नं न्ह्यःब्वयादिइगु खः ।
ज्याःझ्वया दथुइ १५ गू मिनेट ताःहाकगु खुशीबही वृत्तचित्र क्यनेगु ज्याः नं जूगु खः।
Categorized in राष्ट्रिय
