तःजिक क्वचाल साहित्य नखः
लहनान्युज | चिल्लागा दशमी ११४२, १३ आईतवाः
![](https://www.lahananews.com/sites/default/files/sahitay-sa.jpg)
किपुलीइ जुयाच्वंगु प्यक्वःगु नेपालभाषा साहित्य नखः म्हिगः शनिवाः क्वचाःगु दु।
शनिवाः जूगु उगु ज्याझ्वलय् ‘किपूया सांस्कृतिक सम्पदा व पर्यटकीय सम्भावना’ विषयस अन्तक्र्रिया ज्याझ्वः जूगु खः। पत्रकार कल्पना महर्जन सहजकर्ता जुयादीगु खःसा वरिष्ठ संस्कृतिविद् प्रयागमान प्रधान, किपू नगरपालिका २ वडाया वडाध्यक्ष नाप नगरपालिकाया सम्पदा पर्यटन संस्कृति विभाग नायः रमेशमान डंगोल व नेवाः लहना विश्व सरसफाई अभियानया अभियन्ता राजमान मानव वक्ता कथं उपस्थित जुयादीगु खः।
अथेहे ‘नेपालभाषा पठनपाठनपाखें साहित्ययात तिबः’ विषयस जूगु अन्तक्र्रिया ज्याझ्वलय् यल महानगरपालिका स्थानीय पाठ्यक्रम विकास समिति सहसंयोजक तुलसीलाल सिं, येँ महानगरपालिका शहरी योजना आयोग दुजः गुजेश्वरी श्रेष्ठ व किपू नगरपालिका शिक्षा समिति दुजः डा. बज्रमुनि बज्राचार्य वक्ता कथं उपस्थित जुयादीगु खःसा नेपालभाषा टाइम्स न्हिपौया सम्पादक सुरेशकिरण मानन्धर सहजकर्ता जुयादीगु खः।
उगु साहित्य नखतय् थीथी साहित्यकारपिन्स थःथःगु रचना पाठ यानादीगु खः। उगु ज्याझ्वलय् स्कूलय् नेपालभाषा पठनपाठनया व्यवस्था यानाः नेपालभाषा विकासय् योगदान यानादीपिं येँ महानगरपालिकाया मेयर विद्यासुन्दर शाक्य, यल महानगरपालिकाया मेयर चिरिबाबु महर्जन, किपू नगरपालिकाया मेयर रमेश महर्जन व किपू नगरपालिकाया उपमेयर नापं प्रवक्ता सरस्वती रिजाल खड्कापिन्त विशेष हनेज्या याःगु खः।
साहित्य नखःया नायः रमेशकाजी स्थापितया सभापतित्वय् न्ह्याःगु उगु ज्याझ्वलय् मूपाहाँ कथं नेपालभाषा मंकाः खलःया नायः जनकवि दुर्गालाल श्रेष्ठ झायादीगु खःसा पाहाँ कथं नेपालभाषा एकेदमिया भाइस चान्सलर मल्ल के सुन्दर उपस्थित जुयादीगु खः।
Categorized in राष्ट्रिय