यलय् ४०म्हसिया मिखादान यात
लहनान्यूज | ११३८ पोहेंलाथ्व द्वादशी (डिसेम्बर ३०, २०१७)
![](https://www.lahananews.com/sites/default/files/26510559_10159769361545501_1754567847_o.jpg)
यलया सिन्चाहिटीइ जूगु मिखाया शिविरय् १७दँ निसें ८०दँ तकया ४०म्हेसिया मिखादान याःगु दु ।
मरणोप्रान्त थःगु मिखाया नानीचापाखें मेपिनिगु दृष्टि प्राप्त जुइगु ज्याय् थुकथं स्वेच्छिक मिखादान यागु खः ।
नेपाल आँखादान समाज तीलगंगानापं सिन्चाहिटी महिला बिद्यालय, सिन्चाहिटी टोल सुधार व इनर व्हील क्लब अफ पाटनया मंकाः ग्वसालय् जूगु मिखा शिविर समाजसेवी मोतिशान्ति शाक्यया कजिसूइ जूगु खः । १७ दँनिसें ८५दँ तकया सहभागी दुगु थुगु शिविरय् निसः व ५२ म्ह स्थानीयपिंनिगु मिखाया जाँच जूगु खःसा मोतिविन्दुया ल्वय् दुपिं १५म्हेसिया निशुल्क शल्यक्रिया जुइगु कजि शाक्यं जानकारी बियादिगु दु । समाजसेवी शाक्यया कजिसूइ थीथी थासय् जूगु थ्व ३९ क्वगु मिखा शिविर खः ।
सिन्चाहिटीया प्रौढ कक्षा शुरु यासें महिला बिद्यालय स्थापना जूगु टोल सुधारया भवनसं थुगु मिखा शिविर संचालन यायेदुगुलिइ प्रधानाध्यापिका नुतन शाक्य नं लयतायादिल । समाजया महिला विकासया नितिं शिक्षा नापं स्वास्थ्य सुधारय् सक्रिय जुइखंगुलिइ टोल सुधार व इनरव्हील क्लबया बिजयालक्ष्मी श्रेष्ठया ग्वाहाली दुगु वयेकलं लुमंकादिल ।
![](http://www.lahananews.com/sites/default/files/pictures/26513334_10159769360635501_1266372048_o.jpg)
![](http://www.lahananews.com/sites/default/files/pictures/26194828_10159769358040501_217430589_o.jpg)