बालाजुइ सतक पीडितं प्रदर्शनयात
लहनान्युज | पोहेलागा चतुर्दशी ११४२, माघ १७ सोमवाः
![](https://www.lahananews.com/sites/default/files/bala_0.jpg)
बालाजुइ सतक विस्तारया इलय् थनाछ्वःपिं स्थानीय ३९ गू परिवारयात पुनस्र्थापना याय्माःगु माग यासें स्थानीय जनता हाकनं आन्दोलित जूगु दु ।
बालाजुइ न्हापा थःगु छेँ दुगु थासय् हे प्लेकार्ड ज्वनाः दनाः सडक विस्तार पीडित संघर्ष समितिपाखें वंगु शनिबाःनिसें अन प्रदर्शन शुरु याःगु खः । संघर्ष समितिया कार्यकर्तातय्सं अन छेँ दुपिं स्थानीय जनतायात वहे थासय् पुनस्र्थापना याय्माःगु माग याःगु दु।
उगु थासय् दुगु ३९ खा छेँयात जबर्जस्ती डोजरं थुना बीधुंकाः स्थानीय जनता उकिया विरुद्ध सर्वोच्च अदालत वंगु खः । सर्वोच्चं छेँ थुनाः खाली जूगु थासय् आःयात छुं नं संरचना मदय्केत अन्तरिम आदेश जारी याःगु खःसां अन सरकारं येँ महानगरपालिकाया सूचना केन्द्रलिसें थीथी ज्याकू तय्त धासें ज्या यानाच्वंगु जूगुलिं उकियात तुरुन्त दिकेगु लागिं थ्व प्रदर्शन यानागु धाःगु दु ।
सरकारपाखें थ्व संरचना निर्माण यानाच्वंगु मदिकल धकाः थःपिंसं आन्दोलन तच्वय्केगु चेतावनि संघर्ष समितिं ब्यूगु दु ।
Categorized in राष्ट्रिय