आहा रारा गोल्डकप फुटबल धेंधें बल्लाःया फाइनल कासा थौं
पोहेलागा एकादशी ११४२, माघ १५ शनिबा
![](https://www.lahananews.com/sites/default/files/aaha%20foot.jpg)
आहा रारा गोल्डकप फुटबल धेंधें बल्लाःया उपाधिया लागिं थौं मनाङ मसर््याङ्दी क्लब व विभागीय टिम नेपाल एपीएफ क्लब म्हितेत्यंगु दु ।
न्ह्यानाच्वंगु धेंधें बल्लाःया सेमिफाइनलय् मछिन्द्रयात ३–१ गोलं बुकाः एपीएफ फाइनल थ्यंबलय् मनाङं टाइब्रेकरय् आर्मीयात ४–३ गोलं बुकाः फाइनल यात्रा क्वःछ्यूगु खः ।
खुक्वः उपाधि त्याकूगु मनाङ १२क्वःगु खुसी फाइनल थ्यंबलय् एपीएफ न्हापांगु खुसी फाइनल थ्यंगुखः । एपीएफ न्हापांगु खुसी उपाधि त्याकाः इतिहास त्याकेगु ताकय् दुसा मनाङ ७क्वःगु खुसी उपाधि थःके लाकेगु आज्जुइ दु ।
पोखराय् म्हिगः याःगु प्रि म्याच कन्फरेन्सय् निगुलिं टिमया प्रशिक्षकं उपाधि त्याकेगु धाःगु खः । एपीएफया प्रशिक्षक कुमार थापां कासामिया ब्वज्यां थः सन्तुष्ट दुगु धयादीगु खः ।
अथे हे, मनाङया प्रशिक्षक फुजा तोपें एपीएफया ब्वज्या लिपांगु इलय् बांलानाच्वंगु थःपिंत बांलाःगु कासा क्यनेगु दबाब दुगु धयादीगु खः । वय्कलं उपाधि त्याकेगु कथं थःपिन्सं म्हितेगु नं धयादिल ।
सहारा क्लब पोखराया ग्वसालय् न्ह्यानाच्वंगु धेंधें बल्लाखय् १० टिमया ब्वति दु । धेंधें बल्लाःया त्याकामि टिमं १० लख व द्वःछि अले ल्यू त्याकामि टिमं ५ लख व द्वःछि तका ल्हातय् लाकी ।
Categorized in कासा