नेपाल व मरिससया न्हापांगु मैत्रीपूर्ण कासा थौं
पोहेलागा एकादशी ११४२, माघ १५ शनिबा
![](https://www.lahananews.com/sites/default/files/maucies.jpg)
नेपालं अफ्रिकी देय् मोरिससलिसे थौं न्हापांगु मैत्रीपूर्ण कासा म्हितेत्यंगु दु ।
दशरथ रंगशालाय् जुइगु कासा न्हिनय् जःछि पाः न्याताः इलय् जुइ । कासा स्वयेत एन्फां स्वब्वय् छब्व स्वकुमियात रंगशाला दुहांवनेगु अनुमति ब्यूगु दु । स्वकुमिं अनिवार्य पूर्ण खोप काःगु जुइमाःसा रंगशालाया गेटय् हे एन्फां एन्टिजेन परिक्षण याइ ।
नेपालं न्हापांगु खुसी आधिकारिक रुपं अफ्रिकी राष्ट्रलिसे म्हितेत्यंगु खः । नेपालं मरिससविरुद्धया निगूगु मैत्रीपूर्ण कासा धाःसा मंगलबाः म्हिती । फिफा वरीयताय् मरिसस नेपाल स्वयां ल्युने दु ।
छुं वाः न्ह्यःनिसें मोरिससलिसेया कासाया लागिं तयारी यानाच्वंगु नेपालया आज्जु न्ह्यःया कासाय् जूगु कमी कमजोरी भिंकेगु जुइगु धाःगु दु ।
म्हिगः जूगु पत्रकार सम्मेलनय् टोलीया कप्तान किरण चेम्जोङं मोरिससविरुद्ध मैत्रीपूर्ण कासा त्याकेत म्हितेगु धयादिल ।
अथे हे, मोरिससया प्रशिक्षक टोनी फ्रान्कोइसं ताः ई लिपा राष्ट्रिय टोलीं अन्तर्राष्ट्रिय भ्रमण याःगु अले थः स्वयां बल्लाःगु टोली जूगुलिं निगू अन्तर्राष्ट्रिय मैत्रीपूर्ण कासा धेंधें बल्लाखं जाइगु प्रतिक्रिया बियादीगु खः ।
Categorized in कासा