किपू नगरपालिकाया ५ नं.व ६ नं. वडाय् न्ह्यानाच्वंगु न्वचू (उद्घोषण) तालिम क्वचाःगु दु।

५ नं. वडाय् वंगु पुस ३ गतेनिसें २५ गतेतक न्ह्याकूगु खःसा उकी मुक्कं ३२ म्हेसिनं ब्वति कयादीगु खः। उगु तालिम वंगु सोमवाः ५ नं. वडाया महिला सुरक्षित स्थान भवनय् क्वचायेकूगु खः ।

किपू नगरपालिकाया प्रमुख रमेश महर्जनया मूपाहाँसुइ न्ह्याःगु थुगु क्वचायेके ज्याझ्वलय् प्रमुख महर्जन, उप–प्रमुख सरस्वती खड्कां तालिमय् ब्वति कयादीपिंत दसि पौ लःल्हानादीगु खः। किपू नगरपालिया उद्यमशील विकास सहजकर्ता नानी महर्जनया संयोजकत्वय् वडा नं. ५ य् ज्याझ्वः न्ह्याःगु खः। अथेहे ६ नं. वडाय् जूगु ज्याझ्वःया नं नगर प्रमुख महर्जनं उलेज्या यानादीगु खः।

ज्याझ्वःया उलेज्या यानादिसें नगर प्रमुख महर्जनं थुगु न्वचू (उद्घोषण) नं छगू कथं कला जूगुलिं बांलाक सयेकादिल जुइ धकाः भलसा कयादिसें आः थुकीयात व्यवहारय् छ्यलाःदीत इनाप यानादिल ।ज्याझ्वलय् उप–प्रमुख सरस्वती खड्कां थःम्हं धायेत्यनागु गुलि नं खँ त दई व मिलेयाना ध्वाथुइक धाये फयेकेमाःगु व न्हापा न्हापां थुलि नं धाये मफयाच्वंगुलिं आः थुगु तालिमं मनय् च्वंगु खँ मग्यासे धाये फत धका धयादीगुलिं थः तसकं लयेताःगु धयादिल।

Categorized in राष्ट्रिय