रोबर्ट लेवान्डोस्कीयात थुगुसीया बेस्ट फिफा अवार्ड, रोनाल्डोयात स्पेसल अवार्ड
पोहेलागा पारु ११४२, माघ ४ मंगलवाः
![](https://www.lahananews.com/sites/default/files/fifa_0.jpg)
थुगुसिइया वेस्ट फिफा अवार्ड रोबर्ट लेवान्डोस्की व अलेक्सीया पुटेलासं त्याकुगु दु ।
विश्व फुटबलया सर्वोच्च निकाय फिफां मिजंपाखेया बेस्ट अवार्ड पोल्याण्डया स्ट्राइकर रोबर्ट लेवान्डोस्कीयात बिउगु खः । जर्मन क्लब बायर्न म्युनिखया नितिं याःगु ब्वज्याया लिधंसाय् लेवान्डोस्की उत्कृष्ट क्वजिउगु खः ।
लेवान्डोस्कीं लिभरपुलया मोहोमद सालाह व पिएसजीया लियोनल मेस्सीयात लिउने लाकुगु खः । मिजंपाखे आः तक्कया हे दक्वःलय् अप्वः गोल यायेत ताःलाम्ह पोर्चुगलया स्ट्राइकर क्रिश्चियानो रोनाल्डों फिफा स्पेसल अवार्ड चूलाकुगु दु ।
अथेहे मिसापाखे बार्सिलोनां व्यावसायीक फुटबल म्हितावःम्ह स्पेनिस मिडफिल्डर अलेक्सीया पुटेलास उत्कृष्ट क्वजिउगु दु । प्रशिक्षकपाखे मिजं व मिसाया निगुलिं अवार्ड चेल्सीया प्रशिक्षकतयेसं चूलाकुगु दु ।
चेल्सीयात च्याम्पियन्स लिग त्याका बिउगुलिं थोमस टुचेल मिजंपाखे उत्कृष्ट प्रशिक्षक क्वजिउगु खः । मिसापाखे चेल्सीयात इंग्लीश लिग त्याका च्याम्पियन्स लिगया फाइनलय् थ्यनेत ताःलाकुगुलिं इम्मा हायसं अवार्ड चूलाकुगु खः ।
चेल्सीया इडुवार्डो मेन्डीं बेस्ट गोलकिपरया अवार्ड त्याकुबलय् डेनमार्कया राष्ट्रिय फुटबल टोलीं उत्कृष्ट टिमया अवार्ड चूलाकल । उत्कृष्ट गोल याःम्हसित बिइगु पुस्कास अवार्ड सेभियाया एरिक लामेलां चूलाकुगु दु ।
Categorized in कासा