इंग्लीश प्रिमियर लिग फुटबलय् म्यान्चेस्टर सिटीं चेल्सीयात १–० गोल अन्तरं बुकल
थिंलागा चतुर्दशी ११४२, माघ २ आईतवाः
![](https://www.lahananews.com/sites/default/files/mann_0.jpg)
इंग्लीश प्रिमियर लिग फुटबलय् वंगु चान्हय् म्यान्चेस्टर सिटीं चेल्सीयात १–० गोल अन्तरं बुकूगु दु ।
थःगु हे मैदानय् जूगु कासाय् म्यान्चेस्टर सिटीयात त्याकेबीत केभिन डे ब्रायनं ७०गूगु मिनेटय् याःगु गोल निर्णायक जूगु खः । कासा त्याकूगुनाप म्यान सिटीं प्रिमियर लिगया ल्या धलखय् निगूगु थासय्च्वंगु चेल्सीनाप १३गूगु ल्याया अग्रता दयेकूगु दु ।
२२गू कासापाखें सिटीया ५६गू ल्या दुसा चेल्सीया ४३गू ल्या दु । प्रिमियर लिगया मेगु कासाय् एस्टन भिल्लां म्यान्चेस्टर युनाइटेडयात २–२गू गोलया ज्वलिंज्वः कासा म्हितूगु दु ।
कासाय् म्यान्चेस्टर युनाइटेडया ब्रुनो फर्नान्डेजं सुरुवाती निगोल याःसां भिल्लाया ज्याकोब राम्से व कोटिन्हों छगोल–छगोल याःगु खः ।
थ्वनाप कासा ज्वलिज्वः जूगु खः । ब्राजिलया कासामि कौटिन्हों एस्टन भिल्लाया नितिं डेब्यु कासाय् गोल याःगु खः । वंगु चान्हय् जूगु मेमेगु कासाय् वुल्भरह्याम्पटन वान्डरर्सं साउथह्याम्पटनयात ३–१गू गोलं बुकूबलय् नरिच सिटीं एभर्टनं २–१गू गोल अन्तरं कासा त्याकूगु दु ।
अथेहे न्युकासल युनाइटेड व वाट्फोर्डं १–१ गोलया ज्वलिंज्वः म्हितूबलय् बर्न्ले व लेष्टर सिटीया कासा कोभिडया हुनिं रद्द याःगु दु ।
Categorized in कासा