अफगानिस्तानय् लखौंलख मनूत सिइफइगु राष्ट्रसंघया ख्याच्वः
थिंलागा द्वादशी ११४२, पुष ३० शुक्रबाः
![](https://www.lahananews.com/sites/default/files/afghan_3.jpg)
संयुक्त राष्ट्रसंघं अफगानिस्तानया लखौंलख सर्वसाधारण सिइफइगु ख्याच्वः बिउगु दु ।
राष्ट्रसंघया महासचिव एन्टोनियो गुटेरसं अफगानिस्तानया आर्थिक संकटं लखौंलख मनूया ज्यान काये फइगु अवस्था वयेफइगु ख्याच्वः बियादीगु खः ।
राष्ट्रसंघया ५ गु अर्ब डलरया मानवीय सहायता कोषय् ग्वहालि यायेत विश्व समुदाययात अपिल याना वयेकलं अफगानिस्तानया रोक्का यानातःगु खाता फुकुवा यायेत विश्व बैंक, आइएमएफ लिसेंयात इनाप यानादीगु दु ।
तसकं ख्वामूगु व सम्पतिविहिन अवस्था अफगान जनताया नितिं तसकं ग्यानापूगु जूगु नं महासचिव गुटेरसया धापू दु । दाताया ग्वहालिइ न्ह्यानावःगु अफगानिस्तानया अर्थतन्त्र तालिवानं सत्ता कजये कायेधुंका झंझं क्वन्ह्यानाच्वंगु दु ।
उकिइ नं तालिवानया शासनयात हाथ्याः बिइत अमेरिका लिसेंया विश्व समुदायं अफगानिस्तानया सम्पति व खाता रोक्का याःगुलिं अर्थतन्त्र चरम संकटय् तक्यंगु दु ।
अमेरिकां जक अफगानिस्तानया ७गू अर्ब डलर रोक्का याःगु दु । अन अस्पतालया चिकित्सक, सेना, पुलिस व सरकारी कर्मचारीं तकं तलब चूलाकाच्वंगु मदु ।
राष्ट्रसंघया महासचिव गुटेरसं ८७ गू लख अफगानीत आः नं निछा नयेखनिगु अवस्थाय् दूगु धका अनया अर्थतन्त्रया नितिं आवश्यक तरलता थथें चूमलाकेगु खःसा अवस्था ग्यानापूगु जुइगु ख्याच्वः नं बियादीगु दु ।
Categorized in अन्तर्राष्ट्रिय