प्रिमियर लिगय सिटिया अग्रता
थिंला द्धादशी ११४२, मंसीर २९ बुधवाः
![](https://www.lahananews.com/sites/default/files/city%20f.jpg)
इंग्लीश प्रिमियर लिग फुटबलय् शिर्ष थासय्दुगु म्यान्चेस्टर सिटीं लिड्स युनाइटेडयात ७–० गोल अन्तरं बुकल ।
वंगु चान्हय् थःगु हे मैदानय् जूगु कासाय् सिटीयात त्याकेबीत केभिन डे ब्रायनं निगोल याःबलय् फिल फोडेन, ज्याक ग्रिएलिस, रियाद माहारेज, जोन स्टोन्स व नाथन आकें छगोल याःगु खः ।
कासा त्याःगुलिसे म्यान्चेस्टर सिटीं लिग धलखय् निगूगु थासय् दुगु लिभरपुलनाप ४गू ल्याया अग्रता दयेकूगु दु । लिगय् १७गू कासापाखें म्यान्चेस्टर सिटीं ४१गू ल्या दयेकूगु दु ।
छगू कासा म्ह्वों म्हितूगु लिरभपुलया ३७गू ल्या दुबलय् स्वंगूगु थासय् दुगु चेल्सीं ३६गू ल्या मुंकूगु दु । वंगु चान्हय् जूगु प्रिमियर लिगया मेगु कासाय् एस्टन भिल्लां नरिच सिटीयात २–० गोल अन्तरं बुकूगु दु ।
नरिचयात इमिगु हे मैदानय् बुकेत भिल्लाया ज्याकोब राम्से व ओले वाट्किन्सं छगोल–छगोल याःगु खः ।
Categorized in कासा