पत्रकार दबू न प्यम्हेसित पत्रकारिता सिरपा लल्हात
रसिया श्रेष्ठ | थिंला पारु ११४२, मंसीर १९ आईतवाः
पत्रकारिताया ख्यलय् ताःईनिसे क्रियाशील प्यम्ह पत्रकारपिन्त सिरपा लल्हागु दु। नेवाः पत्रकारतयेगु राष्ट्रिय संगठन नेवाः पत्रकार राष्ट्रिय दबूया ग्वसालय् यलया सप्तपुर महाविहार चिकंबहीलय् गुक्वःगु साधारण सभा नाप कार्यकारिणी सभाय् उगु सिरपा लल्हागु खः।
ज्ञानज्योति–लक्ष्मीप्रभा पत्रकारिता सिरपा पोखरया पत्रकार उदयबहादुर अमात्ययात हनापौं नाप नगद २० हजार रुपैयाँ लल्हागु खः। अथेहे यल जिल्लाय् न्हापागु अपांगमैत्री भवन दयकादीम्ह समाजसेवी मोतिशान्ति शाक्यं थः मां व अबुया नामय् स्थापना यानादीगु ज्ञानदेवी–मणी पत्रकारिता स्मृति पत्रकारिता सिरपा कान्तिपुर दैनिकया पत्रकार प्रशान्त मालीयात नगद राशि १५ हजार रुपैयाँ नाप हनपौ लल्हागु खः।
अथेहे मेगु सिरपा नेपाः न्हापागु त्रिपिटकाचार्य नाप २००१ य् तत्कालीन प्रधानमन्त्री जुद्ध शम्शेरं पितिना छ्वंपि च्याम्ह भिक्षु मध्ये छम्ह भिक्षु कुमारकाश्यप महास्थविरया नामय् भिक्षु कौण्डन्यं स्थापना यानादीगु भिक्षु कुमारकाश्यप स्मृति पत्रकारिता सिरपा बोधि टेलिभिजनया पत्रकार विमला शँक्ययात नगद राशि १२ हजार रुपैयाँ नाप हनापौ लल्हागु खः। अथेहे समाजसेवी नाप व्यवसायी बाबुराजा ज्यापू फोटो पत्रकारिता सिरपा वरिष्ठ फोटोपत्रकार पद्मसागर कक्षपतियात नगर राशि १० हजार रुपैयाँ नाप हनापौ लल्हागु खः।
सिरपा कयादीपिन्त पत्रकार दबूया अध्यक्ष सुरजवीर बज्राचार्यं स्वाम्ह, नेवाः देय् दबूया अध्यक्ष नरेश ताम्रकारं दोसल्ला, संघीय मामिला तथा सामान्य प्रशासन मन्त्री राजेन्द्र श्रेष्ठं हनापौ नाप दातापिन्स लल्हागु खः। उगु ज्याझ्वलय् मन्त्री श्रेष्ठं नेपाल भाषाया पत्रकारिता विकासया लागि, सञ्चारमाध्यम समावेशी दयकेगु निति सरकारपाखे थःगु पलाः ल्ह्वनेगु जुइ धका धयादीगु खः। दबूया सल्लाहकार नरेशवीर शाक्यं मातृभाषा पत्रकारिताया विकास यायेत न्हापा नेपाल भाषा व मैथिली भाषाय् आचारसंहिता प्रकाशन जुगु उल्लेख यासे धर्मादित्य धर्माचार्ययात मातृभाषाया न्हापाम्ह पत्रकारया रुपं स्थापित यायेमाः धका धयादीगु खः।
पत्रकार दबूया केन्द्रीय अध्यक्ष सुरजवीर बज्राचार्य सभाध्यक्षतायु जुगु उगु ज्याझ्वल् नेपाल आदिवासी जनजाति पत्रकार महासंघया वरिष्ठ उपाध्यक्ष गजुरधन राई, नेपाल पत्रकार महासंघया केन्द्रीय सचिव नारायणसुन्दर किलम्बु, राष्ट्रिय दलित पत्रकार संघया वरिष्ठ उपाध्यक्ष गोपाल बराइली, दबु वरिष्ठ उपाध्यक्ष नृपेन्द्रलाल श्रेष्ठ, महासचिव सुनील महर्जन, सचिव के. के मानन्धर व कोषाध्यक्ष सुरेन्द्रभक्त श्रेष्ठं दबुया अक्षय कोष थुगु दँय् तक ५० लाख थ्यकयेगु लक्ष्य दु धका धाउगु खः।
Categorized in राष्ट्रिय
