युवा नेता राजेन्द्र लिङ्देन राष्ट्रिय प्रजातन्त्र पार्टी, राप्रपाया न्हूम्ह नायः जूगु दु ।

राप्रपाया म्हिगः क्वचाःगु महाधिवेशनं युवा नेता लिङ्देनयात निर्वाचित याःगु खः । लिपांगु मत परिणामय् लिङ्देनं कमल थापायात निसःक्व मतं ल्यूनय् लाकूगु खः । कुल ३द्व ८सः व ७३क्व मत कुदुवंगुलिइ लिङ्देनयात १८सः व १७क्व मत चूलाःगु खःसा थापायात १६सः व १७क्व चूलाःगु खः ।

४सः व ३१क्व मत बदर जूगु राप्रपाया निर्वाचन समितिं धागु दु । लिङ्देन त्याःगुनाप राप्रपाया नेतृत्व युवा पुस्ताय् थ्यंगु दु । मेमेपिं पदाधिकारीतय्गु न मतगणना क्वचायेधुंकूगु दु । थ्वहेकथं न्वकू पदय् विक्रम पाण्डे, बुद्धिमान तामाङ व ध्रुबबहादुर प्रधान अले मिसा न्वकुलिइ रोशन कार्की त्याःगु दु ।

अथेहे महामन्त्रीइ धवल शमशेर राणा, भुवन पाठक व कुन्तीकुमारी शाही त्याःगु दु । उखय् , नायः पदय् बूम्ह कमल थापां थः बूगु स्वीकार यानाः नवनिर्वाचित नायः राजेन्द्र लिङ्देनयात भिंतुना देछानादीगु दु ।

तर थापां थःत बुकेत निर्मल निवासं भूमिका म्हितूगु द्वपं बियादीगु दु । मतगणना क्वचाःगुनाप थौं सुथय् ट्वीट यानाः पुलांम्ह जुजु ज्ञानेन्द्र शाहयात भिंतुना बियाः जुजुया भलो जुइमा धकाः कामना यानादीगु दु ।

थापां २०६३ सालंनिसें जुजु पक्षय् ज्या यानावयागु जूसां आः वयाः उकिया प्रतिफल चूलाःगु धकाः उल्लेख यानादीगु दु ।

Categorized in राष्ट्रिय