राष्ट्रपति विद्यादेवी भण्डारीं बुद्ध जन्म जुगु थाय् लुम्बिनी व नाप स्वागू कपिलवस्तु, नवलपरासी व रुपन्देहीया थीथी थाय् बुद्धस्थल नाप स्वाना विशेष योजना दयकेमाः धका धाउगु दु।

लुम्बिनी विश्वविद्यालयया १७ क्वःगु वार्षिकोत्सवया लसताय् जुगु थौं लुम्बिनीइ जुगु ज्याझ्वलय् वयकलं संघ, स्थानीय व प्रदेश सरकारं लुम्बिनीनाप स्वागू सम्बन्धित दक्को थाय् स्वाना विशेष योजना दयकेमाः धका धाउग दु।

राष्ट्रपति भण्डारीं लुम्बिनी गुरुयोजना याकन हे पूरा यायेत इनाप याउगु दु। लुम्बिनी हलियक बौद्धमार्गीया लागि विशेष महत्वगु थाय् जुगुलि लुम्बिनीया विकासमा स्वंगु हे तहया सरकारं ध्यान बिइमाः धका धाउगु दु।

लुम्बिनीया प्रदेश प्रमुख अमिक शेरचनं बुद्धया उपदेश आःतक न सकसिया लागि अनुकरणीय जू धका धयादीगु खः। उगु समारोहय् शिक्षामन्त्री देवेन्द्र पौडेलं बुद्ध शिक्षानाप स्वागू विषय स्वगु हे तहया सरकारं प्राथमिकता बिया न्ह्या वनेमाः धका धाउगु दु।

उगु ज्याझ्वलय् विश्वविद्यालयं लुम्बिनीया न्हापागु त्रियान प्रज्ञा सम्मेलन तक जुगु खः। सम्मेलनय् नेपालया बौद्ध विद्धान नाप अनुसन्धानकर्तापिन्स बौद्ध संस्कृति व समृद्धिया विषय कार्यपत्र न्ह्यब्बगु खः ।

Categorized in राष्ट्रिय