शेयर बजाः कारोबार जुइगु थौं लिपागु दिं बिहीवाः शेयर बजाः परिसूचक नेप्से झन्डै ५० अङ्कं घटे जुगु दु।

नेप्से थौं ४९ दशमलव शून्य ३ अङ्कं घटे जुया २ हजार ५ सय ८४ दशमलव ६१ विन्दुइ कुहावंगु दु। थौं दक्को समूहया शेयर घटे जुगुलि विकास बैंक, बीमा, फाइनान्स, माइक्रोफाइनान्स व मेमेगु समूहया शेयर तसकं कुहावंगु दु।

थौं २ सय ३१ कम्पनीया ७९ लाख ३२ हजार कित्ता शेयर ३ अर्ब ४१ करोड रुपैयाँया कारोबार जुगु दु। दकलय् अप्वो महालक्ष्मी विकास बैंकया १२ करोड ४३ लाख रुपैयाँया शेयर किनबेच जुगु दु।

कर्पोरेट विकास बैंक व मैलुङ खोला जलविद्युत् कम्पनीया शेयर साढे ६ प्रतिशत स्वया अप्वो घटे जुगु दु। समग्र बजाः घटे जूसा साम्लिङ पावर व न्यादी हाइड्रोया शेयर १० प्रतिशतं बढे जूगु दु।

थुगु वाः आइतवाः, सोमवाः व मङ्गलवाः घटे जुगु नेप्से बुधवाः सामान्य थहावंगु खः। तर वाःया लिपागु दिं झन्डै ५० अङ्कं घटे जुगु खः। समग्र धायेगु खःसा थुगु वाः दुने नेप्से १५० अङ्क स्वया अप्वो घटे जुगु खः।

Categorized in राष्ट्रिय