महर्जन कम्प्लेक्सया दय्केज्या लिपांगु चरणय्
रसिया श्रेष्ठ | कछलागा पंचमी ११४२, मंसीर ८ बुधवाः
येँया न्हूसतकस्थित महर्जन बिजनेस एसोसिएट्स (एमबिए) प्रालिं दय्काच्वंगु बहुचर्चित व्यापारिक भवन महर्जन कम्प्लेक्सया दय्केज्या लिपांगु चरणय् थ्यंगु दु । आः थुगु भवनया दय्केगु ज्या ९९ प्रतिशत धइथें क्वचायाः छुं फिनिसिङया ज्या जक ल्यं दुगु धाःगु दु ।
एमबिएया नायः कृष्णलाल महर्जनं भवनया दय्केज्याय् छुं ल्यंपुल्यं ज्या जक ल्यं दनिगु व ओपनिङया लागिं तयार जूगु धयादिल । ‘दय्केज्याया शुरुवाती चरणय् लाःवःगु थीथी पंगःया लिसें निक्वः निक्वःया लकडाउनया हुनिं नं छुं लिबाःगु खः, आः भवन तयार जुइधुंकल, याकनं हे कम्प्लेक्स उलेज्या याय्त्यना’ महर्जनं धयादिल ।
कम्प्लेक्सय् लिफ्ट, क्याप्सुल लिफ्टलिसें एलिभेटर नं जडान यानातःगु दुसा स्वच्छ फय्या लागिं धकाः दथुइ खुल्ला थाय् नं त्वःतातःगु दु । बसन्तपुर दरवार स्क्वाएरलिसे स्वाःगु भवनं बसन्तपुरया साँस्कृतिक दृश्यलिसें न्यूरोड, वंगःया चहलपहल नं स्वय्फइ । कम्प्लेक्सय् दुहांवइपिनिगु सुविधायात नं ध्यानय् तयाः भवनया सजावटय् आधुनिक व साँस्कृतिक, प्राकृतिक झलक बीत स्वयागु महर्जनया धापू खः ।
कम्प्लेक्सय् अप्वःथे थाय् बुक जुइधुंकूगु व छुं छुं जक ल्यं दनिगु वयकलं धयादिल । कम्प्लेक्सया भूमिगत तल्लाय् फुड कोर्ट व मेमेगु स्पेशय् नं लुँवहःया तिसापसः लिसें मेमेगु नं पसः आदिया लागिं थाय् बुक जुइधुंकूगु महर्जनं जानकारी बियादिल । तत्कालीन त्रिस्टल होटल भवन २०७२ सालय् एमबिए कम्पनीं न्यानाकयाः महर्जन कम्प्लेक्स भवनया दय्केज्या न्ह्याकूगु खः।
नेपाःया न्हापांगु नियो क्लासिकल दावी यानातःगु व्यापारिक भवनया स्वरूपयात युनेस्कों तकं बसन्तपुरया गद्दी वैठकलिसे ज्वःलाःगु धाःगु दु।
Categorized in राष्ट्रिय
