निर्वाचन आयोगं मंसिर १७ गतेनिसे स्थानीय तहया केन्द्रपाखे मतदाता नामावली सङ्कलन सुरु याइगु जुगु दु।

आःतक ७७ जिल्ला प्रशासन कार्यालय व ४० इलाया प्रशासन कार्यालयपाखे मतदाता नामावली संकलन जुयाच्वंगुलि आः स्थानीय तहया केन्द्रपाखे न मतदाता नामावली संकलन याइ धका प्रवक्ता शालिग्राम शर्मा पौडेलं जानकारी बिउगु दु।

वयकःया कथं इलाका प्रशासन कार्यालय व जिल्ला प्रशासन कार्यालय दुगु स्वया ६३७ स्थानीय तहया केन्द्रपाखे मतदाता नामावली सङ्कलन यायेत्यंगु खः। हिमाली व पहाडी जिल्लाया स्थानीय तहय् झीन्हु तक व तराई, भित्री मधेश नाप स्वनिगःया स्थानीय तहय् १५ दिं तक मतदाता नामावली संकलन याइ धका आयोगं धाउगु दु। आयोगं १६ दँ पुरा जूपि नेपाली नागरिकता दुपिनिगु विवरण संकलन यायेत्यंगु खः। तर मतदाता नामावलीइ नां धासा १८ दँ पूरा जूपिनिगु जक समावेश याइ।

आयोगं मंसिर १७ गतेनिसे दक्को निर्वाचन कार्यालयपाखे व मेमेगु जिल्लाया नागरिकपिनिगु विवरण संकलन यायेत्यंगु खः। आःतक स्थायी ठेगाना दुपि जिल्ला प्रशासन कार्यालय व निर्वाचन कार्यालयपाखे जक मतदाता नामावली संङ्कलन यानाच्वंगु खः।

Categorized in राष्ट्रिय