येँ महागनरपालिकाया प्रवक्ता लिसें १५ वडाया अध्यक्ष ईश्वरमान डंगोलं येँ महानगरया हरेक वडाय् सार्वजनिक शौचालय दय्केगु स्वीकृत नीति दय्काः नीति कार्यान्वयन गर्ने बजेट नं दुगु तर, कार्यान्वयनय् छुं समस्या दुगु धयादीगु दु।

विश्व शौचालय दिवसया अवसरय् सरसफाईया क्षेत्रय् ज्या याइगु सरकारी व गैरसरकारी संघसंस्थां याःगु ज्याझ्वलय् नवासें प्रवक्ता डंगोलं सार्वजनिक शौचालय धयाकथं नवइ धयागु मानसिकताया हुनिं गनं नं शौचालय दय्केगु योजना वयाकथं स्थानीयं हे विरोध याइगु धयादिल। ‘तर, आः झी पुलांगु अवस्थां थहांवय्धुन। थौंकन्हय्या शौचालय प्रविधियुक्त व वातावरणमैत्री जुइ’ डंगोलया धापू खः।

ज्याझ्वलय् खानेपानी मन्त्रालयया सचिव प्रमिलादेवी शाक्य बज्राचार्य सरकारं त्वनेगु लः व सरसफाइया लागिं विनियोजन याइगु बजेट बढ्न मगाःगुलिं गाक्क ज्या याय्मफूगु धयादिल। अथे हे, काठमाडौ उपत्यका खानेपानी व्यवस्थापन बोर्डया कार्यकारी निर्देशक सञ्जीव विक्रम राणा, पब्लिक हेल्थ इन्जिनियर्स नेपाल (सोफेन) या नायः अनिलभद्र खनाल, सरसफाइ विज्ञ शरद अधिकारीलिसें नं सरसफाइया नितिं शौचालयया महत्वबारे नवानादीगु खः।

गोष्ठीइ खानेपानी तथा ढल व्यवस्थापन विभागया ढल व्यवस्थापन तथा वातावरणीय सरसफाइ शाखाया प्रमुख प्रभात श्रेष्ठं सरसफाइया वर्तमान अवस्थायाबारे ज्यापौ न्ह्यब्वयादीगु खः। गुथिया प्राविधिक सल्लाहकार प्रकाश अमात्यं सार्वजनिक शौचालयया अवस्था छ्यलेफइगु प्रविधिया बिषयस नवानादीगु खः।

Categorized in राष्ट्रिय