शहीद स्मारक ‘ए’ डिभिजन लिगमा थ्रीस्टार क्लवया सानदार सुरुवात
कछलागा द्वितिया, मंसीर ५ आइतबाः
![](https://www.lahananews.com/sites/default/files/sahid.jpg)
थ्री स्टार क्लबं सहिद स्मारक ‘ए’ डिभिजन लिग फुटबलय् विजयी सुरुवात याःगु दु ।
त्रिपुरेश्वरस्थित दशरथ रंगशालाय् शनिबाः जःलाखःला क्लब च्यासल युथ क्लबयात ३गू–०या गोल अन्तरं बुका थ्री स्टारं सानदार सुरुवात याःगु खः । थ्री स्टार त्यागुलिइ निशान खड्का, राफायल बिडीयास रिम व अनन्त तामाङं छगू छगू गोल याःगु खः ।
थ्री स्टारं न्हापांगु हाफय् हे निगू गोल याःगु खः । कासाया २२गूगु मिनेटय् निशानं गोल याना थ्री स्टारयात सुरुआती अग्रता बिउगु खः । कासाया २६गूगु ं मिनेटय् च्यासलं पेनाल्टीइ गोल याये मफूगु खः ।
च्यासलया नेपाली मुलया इटालियन फरवार्ड विकास मेराग्लियाया पेनाल्टी प्रहार थ्री स्टाया गोलकिपर प्रिसों पनाबिउगु खः । कासा त्यागुलिसें थ्री स्टारं न्हापांगु कासाय् हे महत्वपूर्ण ३गू ल्याः मुंकुगु दु । म्हिगः हे जूगु न्हापांगु कासाय् हिमालयन शेर्पा क्लब व संकटा क्लबं ज्वलिन्ज्वः कासा म्हिता ल्याः इनाकागु दु ।
संकटा व हिमालयनं १गू–१गू गोलया ज्वलिन्ज्वः म्हितुगुृ खः । लिग अन्तर्गत आइतबाः निगू कासात जुइ । न्हापांगु कासाय् ब्रिगेड ब्वाइज क्लबं एपीएफ फुटबल क्लबलिसे धेंधेंबल्ला याइ ।
निगूगु कासाय् मनाङ मस्याङ्दी क्लबं जावलाखेल युथ क्लबलिसे म्हितिइ ।