आइसीसी ट्वेन्टी–ट्वेन्टी विश्वकपय् भारतं स्कटल्यान्डयात ८गू विकेटं बुकल
कछलाथ्व द्धितीया ११४२, कार्तिक २० शनिवाः
![](https://www.lahananews.com/sites/default/files/india%20win.jpg)
भारतं आइसिसी टि२० विश्वकप २०२१ य् स्कटल्यान्डयात ८ गू विकेटं बुका सेमिफाइनल थ्यनेगु सम्भावना कायम हे यानातःगु दु ।
सुपर १२ या पुचः २ लय् दूगु भारतं स्कटल्यान्डयात सानदार जित लिसें नेटरनरेटय् सुधार याना सम्भावनाया आशा अप्वयेकुगु दु । कासा त्याकेगु नितिं ८६गू रनया सामान्य विजयी लक्ष्य लिउगु भारतं ६गू फुति ३ गू ओभरय् २ गू विकेट तंका पूवंकुगु खः । भारतया ओपनर लोकेश राहुलं १९गः बलये् ६गू चौका व ३ गू छक्का लिसें ५०गू रनय् आउट जूगु खः ।
राहुलं १८गः बलय् हे अर्धशतक पूवंकुगु खः । रोहित शर्मा १६गः बलय् ५गू चौका व १गू छक्का लिसें ३०गू रनय् एलबीडब्लू आउट जुल । ओपनर रोहित व रोहलं न्हापांगु विकेटया नितिं ५गू ओभरय् ७०गू रनया विष्फोटक ब्याटिङ लिसें उत्कृष्ट सुरुवात बिउगु खः ।
भारतं न्हापांगु पावर प्ले अर्थात ६गू ओभरय् २गू विकेट तंका ८२ गू रन दयेकुगु खः । थुगु पावर प्लेलय् भारतं दयेकुगु सर्वाधिक रन खः । सूर्यकुमार यादव ६गू व विराट कोहली २ गू रनय् अविजित जुल ।
वयान्ह्यः दुबई इन्टरनेशल क्रिकेट स्टेडियमय् टस बुना ब्याटिङ न्ह्याकुगु स्कटल्यान्ड १७गू फुति ४गू ओभरय् ८५गू रनय् अल आउट जूगु खः । स्कटल्यान्डया ओपनर जर्ज मुन्शें १९गः बलय् ४ गू चौका व १गू छक्का लिसें दक्वःलय् अप्वः २४ गू रन दयेकुगु खः । कलुम म्याकलड १६गू व माइकल लिस्क २१गू रनय् आउट जुल ।
तीव्र गतिया बलर जस्प्रित बुमराहं ३गू ओभरया ३गः बलय् ओपनर लिसें कप्तान काइल कोट्जरयात १गू रनय् बोल्ड आउट याःगु खः । ६गूगु अोभरया निगूगु बलःलय् तीव्र गतिया बलर मोहम्मद शामीं मुन्शेयात हार्दिक पान्ड्यापाखें क्याच याकेधुंका स्कटल्यान्डं रन मुनेत संघर्ष यायेमाःगु खः । वयांलिपा स्पिनर रविन्द्र जडेजां स्कटल्यान्डया ब्याटिङक्रम धरासय याःगु खः ।
थुगु जितलिसें भारत ३गूगु थासय् थ्यंगुदु । भारतया ४ गू कासाय् २ गू जित व २ गुलिइ हार जूगु लिसें ४ गू ल्याः नापं ३गूगु थासय् थ्यंगु दु । भारतं लिपांगु कासाय् नामिबियायात सोमबाः तःधंगु अन्तरं बुकेमाः ।
तर लिपांगु कासाय आइतबाः न्युजिल्यान्ड अफगानिस्तानलिसे बूसा जक भारत सेमिफाइनलय् थ्यनिइ ।न्युजिल्यान्ड त्यासा भारत धेंधेंबल्लां पिहाँवनिइ ।
Categorized in कासा