विश्वकप टि–ट्वेन्टी क्रिकेटय् इंग्ल्याण्डं मदिक्क प्यक्वःतक त्याकल
कौलागा द्धादशी ११४१, कार्तिक १६ मंगलवाः
![](https://www.lahananews.com/sites/default/files/england%2011.jpg)
विश्वकप टि–ट्वेन्टी क्रिकेटय् इंग्ल्याण्डं श्रीलंकायात २६गू रनं बुकूगु दु ।
युएईया दुबइलय् वंगु चान्हय् जूगु कासाय् इंग्ल्याण्डं ब्यूगु सछि व ६४गू रनया लक्ष्य ल्यूगु श्रीलंका सछि व ३७गू रनय् लिकुंगु खः । श्रीलंकाया नितिं हसरंगां ३४गू रन दयेकूबलय् इंग्ल्याण्डया मोइन अली व आदिल रासिदं २गू–२गू विकेट काःगु खः ।
थ्वसिवे न्ह्यः टस बुनाः न्हापां व्याटिङ याःगु इंग्ल्याण्डं जोस बट्लरया अविजित सछि व १गू रनया ग्वहालिइ ४गू विकेटया क्षतिइ सछि व ६३गू रन दयेकूगु खः । कासा त्याःगुलिसे इंग्ल्याण्डं विश्वकप टि–ट्वेन्टी क्रिकेटया सेमिफाइनल थ्यंकेगु सम्भावनायात बःलाकूगु दु ।
मदिक्क प्यक्वःतक कासा त्याकाः ८गू ल्या दयेकूगु इंग्ल्याण्ड पुचःया दकले न्ह्यःनय् दु । ३गू कासापाखें ४गू–४गू ल्या दयेकूगु दक्षिण अफ्रिका व अष्ट्रेलिया छसिकथं निगूगु अले स्वंगूगु थासय् दु । ६गू पुचः दुथ्याःगु पुचःपाखें शिर्ष निगू पुचः सेमिफाइनल थ्यनी ।
विश्वकप टि–ट्वेन्टी क्रिकेटय् थौं निगू कासा जुइ । न्हिनय् जःछि पाः ४ताः ईलय् आबुधाबीइ जुइगु कासाय् दक्षिण अफ्रिका व बंगलादेशदथुइ धेंधेंबल्ला जुइ । बहनी जःछिपाः ८ताः ईलय् पाकिस्तानं नामिबियालिसे म्हिती ।
Categorized in कासा