सवारी चालक अनुमतिपत्र (लाइसेन्स) या अनलाइन आवेदन प्रणाली बन्द जूगु दु । यातायात व्यवस्था विभागं फुक्क कथंया सवारी लाइसेन्सया नितिं आवेदन चायेकूगु प्यन्हुलिपा बन्द याःगु खः ।

अनलाइन प्रणालीइ प्राविधिक समस्या वःगु धासें बन्द याःगु दु । अनलाइन प्रणाली सुधार यायेमाःगु धासें बिहीवाःनिसें आवेदन बन्द याःगु दु । विभागं न्हूगु लाइसेन्सया आवेदन सोमवाः सनिलय् ५ताः ईलंनिसें चायेकूगु खः ।

तर, खुलालिपा आवेदन चाःगुनाप छक्वलं उप्वः चाप जूबलय् अनलाइन प्रणालीइ हे समस्या वःगु विभागया सूचना अधिकारी लोकनाथ भुसालं जानकारी बियादिल । वय्कलं लाइसेन्स आवेदन चायेकूगुलिसे थ्यंमथ्यं १०गू लखम्हेसिनं छक्वलं फाराम जायेकेगु कुतः याःबलय् बुधवाःनिसें पूर्णरुपय् सर्भर डाउन जूगु जानकारी बियादीगु दु ।

प्राविधिकनापया पुचलं मर्मतया ज्या न्ह्याकेधुंकूगु हुनिं फक्व याकन आवेदन चायेकेगु वय्कलं धयादिल । सवारी चालक अनुमतिपत्र लाइसेन्सया नितिं आवेदन बियाःच्वंपिं अझं स्वंगूत्या लख झ्वः छुनाच्वंगु दनि ।

थ्व ल्या स्वनिगलय् दुगु ज्याकूथी दुगु दकले उप्वः खः । स्वनिगलय् ४गू अले स्वनिगलंपिने २१गू यातायात व्यवस्था ज्याकूत दु । विभागया सूचना अधिकारी भुसालं थ्वसिवे न्ह्यः हे आवेदन बियाःच्वंपिनिगु पाः न्हापालाक्क वइगु न धयादीगु दु ।

वयकलं आःतिनि आवेदन ब्यूपिनिगु पाः धाःसा स्वनिगलय् प्यला अले स्वनिगलंपिने लच्छिदुने वइगु जानकारी बियादिल । विभागं आः न्हूगु मापदण्ड कथं लाइसेन्सया परीक्षा कायेगु ज्या न्ह्याकूगु दु ।

न्हूगु मापदण्ड कथं लिखितय् ६०गू प्रतिशत अले प्रयोगात्मक परीक्षाया नितिं थीथी चरणय् यानाः ७०गू ल्या हःसा जक पास जुइगु व्यवस्था याःगु दु ।

Categorized in राष्ट्रिय