नेपालं नेदरल्यान्ड्सयात तब्यागु हाथ्या बिया नं बुइमाल
चौलाथ्व अष्टमी, ११४१, वैशाख ७ मंगलबाः
![](https://www.lahananews.com/sites/default/files/Netherlands-1.jpg)
येँ न्ह्यानाच्वंगु त्रिकोणात्मक ट्वेन्टी ट्वेन्टी क्रिकेट श्रृंखलाय् नेपाः बूगु दु । लगातार निगू जित हासिल याःगु नेपालं स्वंगूगु कासा धाःसा नेदरल्यान्ड्सलिसे स्वंगु विकेटं बुइमाःगु खः ।
न्हापांगु कासाय् नेदरल्याण्ड्सयात ९गू विकेटं बुका बल्लागु नेपाः तब्यागु योगलफ दयेकेत ताःलासां बुइमाःगु खः । टियु क्रिकेट ख्यःलय् जूगु कासाय् नेदरल्याण्डं निसः व न्हेगू रनया विजयी हाथ्या स्वंग बल ल्यंदनिबलय् हे ७गू विकेट तंका पूवंकल ।
बास डे लिडें ४२ गः बलय् अविजित जुया ८१गू व बेन कुपरं ३५ बलय् ५५गू रन दयेका तब्यागु हाथ्या बिउसां बुइमाःगु खः । नेपाःया नितिं सन्दीप लामिछानें ४गू विकेट काःसां नेदरल्याण्ड्सयात त्याके माफुत । अविनाश बोहरा, करण केसी व अविनाश बोहरां छगू, छगू विकेट काःगु खः ।
नेपालं टस त्याका न्हापां ब्याटिङ याना ट्वेन्टी ट्वेन्टीइ निगूगु दकले आःपा रन थपू यायेगु झ्वलय् २०गू ओभरय् ६गू विकेट छ्वया निसः व खुगु रन दयेकूगु खः । थ्वहे श्रृंखलापाखें डेब्यु याःगु ओपनिङ ब्याट्सम्यान कुशल भुर्तेलं लगातार स्वंगूगु अर्धशतक दयेका विश्व कीर्तिमान दयेकेगु झ्वलय् ४६गः बलय् ६२गू रन तंगु खः । भुर्तेलया डेब्युलिसें लगातार स्वंगु अर्धशतक दयेकूम्ह न्हापांम्ह कासामी खः । अथेहे उपकप्तान दीपेन्द्रसिंह ऐरीं न्हापांगु अर्धशतक दयेकेत ३०गः बलय् ६०गू रन थपू याःगु खः ।
थ्वः हारलिपा नेपाः स्वंगु कासां ४गू ल्यालिसें न्हापांगु थासय् लानाच्वंगु दु । नेदरल्याण्ड्स नं लगातार निगू कासा त्याका ३गू कासां ४गू ल्यालिसें निगूगु थासय् लानाच्वंगु दु । निगू कासा बुनाः मलेलिसया लिपांगु थासय् दु । बुधबाः नेदरल्याण्ड्स व मलेसिया दथुई कासा जुई । थ्वः कासाय् नेदरल्याण्ड्स त्यात धाःसा नेपाल व नेदरल्याण्ड्स दथुई उपाधिया नितिं फाइनल कासा जुइ । नेपाः छगू कासा म्हिते ल्यंदनिबलय् हे फाइनलय् थ्यंगु खः । फाइनल कासा शनिबाः जुई ।