मेयर कप क्रिकेटय पुलिसया, बागमतीयात न्हापांगु सफलता, सशस्त्र बुत
सिल्लागा एकादशी ११४१, फागुन २५ मंगलवाः
![](https://www.lahananews.com/sites/default/files/1615289063bagmati.jpg)
नेपाल पुलिस क्लबं येँ न्ह्यानाच्वंगु मेयर कप छगू दिवसीय मिजं क्रिकेट धेँधेँबल्लाखय् निगूगु सफलता हासिल याःगु दु । त्रिभुवन आर्मी क्लबयात ३गू विकेटं बुका पुलिसं निगूगु जित हासिल याःगु खः ।
मुलपानी क्रिकेट मैदानय् आर्मीं बिउगु ८८गू रनया म्हो लक्ष्य पुलिसं १८ ओभर ३ बलय् ७गू विकेट छ्वाया पूवंकल । पुलिसयात त्याकेत सुनिल धमलां अक्वले अप्वः ३९गू रन दयेकल ।
आर्मीया शाहब आलम छम्हेसियां हे ७गू विकेट कासां नं टिपयात त्याकेत ताःमलात । थ्वसिबेन्ह्यः टस त्याका न्हापां ब्याटिङ ल्यःगु आर्मीं ३० ओभर १ बलय् अलआउट जुया ८७गू रन दयेकूगु खः ।
लोकेश बमं ३२गू रन दयेकूगु इनिङ्सय् पुलिसया सागर ढकालं ५, पवन सर्राफं ३ व ललित राजवंशीं २गू विकेट काःगु खः ।
थुखे बागमती प्रदेशं न्हापांखसी त्याःगु दु । सशस्त्र प्रहरीया एपीएफयात २७ रनं बुका बागमतीं न्हापांगु जित हासिल याःगु खः ।
टियु क्रिकेट ख्यःलय् बागमतीं बिउगु २ सः व ३४ रनया हाथ्या एपीएफं ४४ ओभर ५गः बलय् अलआउट जुया २ सः व ६गू रन जक दयेकूगु खः । आशिफ शेखं ५० रन दयेकुसां टिमयात त्याके मफुत ।
बागमतीया सोनु देवकोटां ६गू विकेट काल । न्हापां ब्याटिङ याःगु बागमतीं ६ विकेट छ्वया २ सः व ३३गू रन दयेकूगु खः । नन्दन यादवं अविजित ६० व कप्तान ज्ञानेन्द्र मल्लं ५७ रन दयेकल ।
एपीएफया अमर रौटेला व किशोर महतों २÷२ विकेट काल । थ्व जितलिसें बागमतीं स्वंगु कासां निगू ल्याः तंगु दु । एपीएफया थ्व न्हापांगु हार खः ।