येँ महानगरपालिकाया वडा नं. १५ या म्ह्याय्मचा मय्जु कृषा महर्जन मिस नेवाः ११४१ या उपाधि त्याकेत ताःलाःगुलिं लसहना ज्याझ्वः क्वचाःगु दु ।

नेवाः देय् दबू, १५ वडा समितिं मय्जु महर्जनयात १५ वडाया सामुदायिक भवनय् नेवाः परम्परा कथं खेँ सगं बिया हंगु खः । मिस नेवाः ११४१ या उपाधि त्याकेत ताःलाम्ह मय्जु महर्जनं नेवाः जाति, भाषा व नेवाः कला, संस्कृतिया हलिंन्यंकं च्वन्ह्याकेगु ज्याय् पला सदां धिसिलाक न्ह्यानाच्वने फयेमा धकाः हना पौ लिसें मतिना चिंपाखें सम्मानित याःगु खः ।

ज्याझ्वलय् मूपाहाँ कथं येँमहानगरपालिका १५ वडाया वडाध्यक्ष एवं येँमनपाया प्रवक्ता भाजु इश्वरमान डंगोल झायादीगु खः । वय्कलं ने.सं. ११४१ मिस नेवाः जुइत ताःलाःम्ह मय्जु कृषा महर्जनयात हनापौ लिसें मतिनाया चिं लःल्हानादीगु खः । सम्मान यायेगु झ्वलय् डंगोलं येँ महानगरपालिकाय् पला पतिकं यक्व हे सम्पदा दुगु अले उगु सम्पदात ल्यंका तयेत सचेतना ज्याझ्वः मिस नेवाः ११४१ कृषा महर्जनपाखें न्ह्याकेगु धयादिल ।

‘नेवाः भाषां याना हे नेवाः संस्कृति, सम्पदा ल्यनाच्वनी । थ्व खँयात मनन् यानाः येँमनापापाखें स्थानीय भाषाया माध्यमं येँ देय्या सम्पदा संस्कृति म्वाका तयेत स्थानीय विद्यालयय् अनिवार्य कथं तगिं छगु निसें च्यागु तक ‘येँ देय् म्हसिके’ धैगु पाठ्यसफू दुथ्याःगु खः ।’ मूपाहाँ डंगोलं धयादिल । हना ज्याझ्वलय् विशेष पाहाँ कथं नेवाः देय् दबूया केन्द्रीय नायः भाजु नरेश ताम्राकार झायादीगु खः ।

वय्कलं नेवाः समाजय् म्ह्याय् मस्तय्त मेपिनिगु समाजय् सिवें माःगु कथं उच्च प्राथमिकता बियाच्वंगुलिं गर्व तायेकादिल । ‘मिस नेवाः ११४१ कृषा महर्जनं आः याकनं हे जुइत्यंगु जनगणनाय् नेवाःतय्गु ल्याः न्हंके मबिकेत सचेतना ज्याझ्वःपाखें थःगु भूमिका म्हितादीगु भलसा कयाच्वना ।’ ताम्राकारं धयादी, ‘नेवाः देय् दबूया न्हापांगु वडा कचा १५ वडा समितिं सम्मानित यानादिम्ह मय्जु कृषा महर्जनं समग्र नेवाः जाति, भाषा, कला, संस्कृतिया च्वन्ह्याकेगुली पलाः सदां सुथां लायेमा ।’

ज्याझ्वलय् पाहाँकथं नेवाः देय् दबू बागमती प्रदेशया नायः भाजु उमेश स्थापित, येँ महानगरपालिका नायः भाजु मचाराजा महर्जनलिसें सम्मानित जुयादिम्ह मय्जुया बा कृष्णकाजी महर्जन व मां हसना महर्जन झायादीगु खः । हना ज्याझ्वलय् समितिया दुजः मय्जु निर्मला डंगोलं सकसित लसकुस यानादीगु खःसा ज्याझ्वःया सभानायः नेवाः देय् दबू १५ वडा कमितिया नायः भाजु मनराजा रंजितं थुगु हना ज्याझ्वलय् झायाः हःपाः व तिव बियादीपिं सकल उपस्थिति भाजु मय्जुपिन्त सुभाय् देछासें सभा क्वचायेकूगु खः ।

Categorized in राष्ट्रिय