केपी ओलीं मनोनित यापिं माओवादी केन्द्रया सांसदतय् पद वनीगु, राष्ट्रियसभा दुजः श्रेष्ठ व खड्का नं पदमुक्त जुइगु
लहनान्यूज | चिल्लाथ्व पारु, ११४१ चैत १, आइतबाः
![](https://www.lahananews.com/sites/default/files/collage-6-scaled%20LAHA.jpg)
नेकपा एमालेया नायः केपी शर्मा ओलीं नेकपा माओवादी केन्द्रया नेतात रामबहादुर थापा बादल, लेखराज भट्ट, टोपबहादुर रायमाझी, गौरीशंकर चौधरी व प्रभु साह लिसेंयात केन्द्रीय दुजः दयेकूगु लिसें उमिगु सांसद पद वनीगु जूगु दु ।
ओलीं बादल व रायमाझी लिसें २३म्हेसित एमालेया केन्द्रीय दुजः नियुक्त याःगुलिसें माओवादीयापाखें निर्वाचित सांसदतय् पद कानुन कथं वनीगु जूगु खः । मन्त्री जूपिंमध्ये थापा व लामा सांसद मखु । थापा माओवादीया नेतृत्व यासें सरकारय् दुथ्यानादीगु खः । व हे इलय् भट्ट नं मन्त्री जूगु खः ।
अथे हे, पुस ५ गते प्रतिनिधिसभा विघटन जुइधुंकाः मेपिं मन्त्रीत सरकारय् दुहांवंगु खः । अथे हे, नारायणकाजी श्रेष्ठ व चन्द्रबहादुर खड्काया नं पद कानुन कथं वनीगु जूगु दु । राजनीतिक दलसम्बन्धी ऐन २०७३ या दफा ३१ य् दल त्याग याये मदइगु व्यवस्था दु ।
उगु दफाया उपदफा १ य् छुं नं दलपाखें उम्मेद्वार जुयाः निर्वाचित संघीय संसद सदस्य, प्रदेश सभाया सदस्य वा स्थानीय तहया सदस्यं अज्याःगु पदया पदावधि कायम दत्तले गुगु दलया उम्मेद्वार जुयाः निर्वाचित जूगु खः व दल त्याग यायेमफइगु धयातःगु दु ।
अथेहे, उपदफा २ स उपदफा १ कथं सुनां दल त्याग याःसा अज्याःम्ह सदस्यया पद वनीगु स्पष्ट व्यवस्था दु । अथे हे, उपदफा २ स १ कथं निर्वाचनय् प्रतिकुल जुइगु कथं सुं नं दुजलं दल त्याग याःसा उम्ह मनू निर्वाचित जूगु पद दल त्याग याःगु मितिं रिक्त जुइगु न्ह्यथनातःगु दु । माओवादी केन्द्रया सांसदतय्सं पद ल्यंकेत धाःसा ४० प्रतिशत सांसद थ्यंकाः एमालेस दुहांवनेगु वा मेगु पार्टी चायेकेफइगु ऐनय् व्यवस्था दु ।
थ्व हे दथुइ माअोवादी केन्द्रं सरकारय् दुथ्यानाच्वंपिं मन्त्रीलिसें एमाले केन्द्रीय दुजः मनोनित जूपिं थः नेतातय्त थौं पौ छ्वइगु जूगु दु । केन्द्रं नेतातय्सं दल त्याग याःगु खः वा मखु धइगु स्पष्ट यायेत इनाप याइगु न्ह्यथंगु दु ।
Categorized in राजनीति