क्षतिपूर्तिविना सतक विस्तारया नामय् छेँ थुंगु धासें फिब्व ख्यःलय् ब्वःज्या
लहनान्यूज | सिल्लाथ्व त्रयोदशी ११४१, फागुन १३ बिहीवाः
सतक विस्तारया झ्वलय् अन्यायपूर्ण कथं विस्थापित याःगु धासें पीडितपिन्त विरोध प्रदर्शन याःगु दु ।
थीथी नागरिक संगठनपिनिगु ग्वःसायलय् थौं फिब्व ख्यःलय् ब्वःज्या यात । सतक विस्तारया झ्वलय् येँया आदिवासी नेवाःपिन्त विस्थापित याःगु व सभ्यता तकं विनास जुयाच्वंग्ु धासें उकिया विरुद्धय् ब्वःज्या यानागु अभियान्ता राजेन्द्र महर्जनं धयादिल ।
बालाजु बाइपासय् च्ंवंगु ४८गू घरधुरीयात सरकारं अन्यायपूर्ण रुपं विस्थापित याःगु पीडितपिनिगु गुनासो दु ।
सर्वोच्च अदालतया अन्तरिम आदेशयात तकं नालामकाइसे मुआब्जा व क्षतिपूर्ति बिना सरकारं छेँ थूंगु पीडितपिनिगु द्वपं दु ।
छेँ थूगू सरकारया ज्याया विरोध यायेवं छेँ थुवा व अभियन्तापिन्त तकं प्रहरी हिरासतय काःगु उमिसं धाल ।
उमिसं कजय् काःपिन्त त्वःतेत माग यासें कानूनी राज्यया माग याना ब्वःज्या यायेमाःगु उपत्यकाव्यापी सडक पीडित संघर्ष समिति दुजः विद्या श्रेष्ठं धयादिल ।
माँभाय् न्ववाःगु हुनिं बालाजु बाइपासया स्थानीयपिन्त प्रहरीं ज्वना कजय् काःगु नेवाः देः दबुः या नायः नरेश ताम्राकारं धयादिल ।
सरकारं सर्वोच्च अदालतया अन्तरिम आदेशयात तकं क्वतेला छेँ थूंगु वय्कया धापू दु ।
दशकौं न्ह्यःनिसें सरकारी नियकालय् सिफारिस कयाः दयेकाःगु छेँ, कानूनी रुपं नं थःपिनिगु जूगु जुसां राजनीतिक कारण थःपिनिगु छेँ थुनाबिउगु पीडित श्यामकृष्ण मानन्धरं धयादिल ।
प्रहरी कजय् दूगु छेँ थुवा व अभियन्तापिन्त मत्वतुले, विस्थापित छेँ जःपिंया बारे न्यायिक निरुपण मजूतले ब्वःज्या यानाहे च्वनेगु ग्वसाःखलया धापू दु ।
Categorized in राष्ट्रिय
