वाम बुद्धिजीवी प्रा. माणिकलाल श्रेष्ठया अन्त्येष्टि
लहनान्युज | चौलाथ्व पंचमी ११४१, चैत्र ५ बिहीवाः
वाम बुद्धिजीवी नाप वरिष्ठ समालोचक प्रा. माणिकलाल श्रेष्ठया अन्त्येष्टि थौं क्वचाःगु दु।
येँया शोभाभगवति कर्णदिपय् वय्कःया तःधीम्ह काय डा. मलखलाल श्रेष्ठं मि तयादीगु खः ।
वय्कःया सीम्हय् शिक्षा मन्त्री कृष्णगोपाल श्रेष्ठ व संविधानसभाया अध्यक्ष सुवास नेम्वाङं नेपाःया ध्वाँय् फायेकादीगु खः ।
नेपालभाषा मंकाः खलःया नायः दुर्गालाल श्रेष्ठ, न्वकु मल्ल के. सुन्दर, नेवाः देय् दबूया नायः नरेश ताम्राकार लगायत भाषा ख्यःया आपालं नेता कार्यकर्तातय् नं उपस्थित दुगु खः । वय्कःया सीम्हय् नेवाः देय् दबूया ध्वाँय् नं फायेकूगु खः ।
वय्कःयात अन्तिम श्रद्धाञ्जलि प्वंकेत डा. बाबुराम भट्टराई, उपेन्द्र यादव, दमननाथ ढुंगाना, राजेन्द्र श्रेष्ठ, नारायणकाजी श्रेष्ठ, येँ मनपाया मेयर विद्यासुन्दर शाक्य, ख्वप नपाया मेयर सुनिल प्रजापति, श्याम श्रेष्ठ, राजेन्द्र महर्जन आदिपिं कर्णदिपय् थ्यंकादीगु खः ।
प्रा. श्रेष्ठया अन्त्येष्टि न्ह्यः वय्कःया सीम्हयात थँहितिइ च्वंगु वय्कःया पुलांगु छेँय् अन्तिम दर्शनया निंतिं तःगु खः । अनं लिपा गाडीं लुति तक थ्यंकूगु खः । वय्कःया सीम्हयात वय्कःया मिजं व मिसापिं छय्पिंसं कुबिउगु खः।
Categorized in राष्ट्रिय
