यें महानगरपालिकां १८सः स्थायी कर्मचारीपिन्त स्वतः छगू तह बढुवा यात
लहनान्यूज | सिल्लाथ्व षष्ठी ११४१, फागुन ५ बुधवाः
येँ महानगरपालिकां दक्वः स्थायी दरबन्दीया कर्मचारीपिनिगु छगू तह व स्तर वृद्धि याःग दु ।
महानगरपालिकां कर्मचारी समायोजन ऐन २०७७ जारी याना श्रेणीविहीन व दक्वः श्रेणीया कर्मचारीपिनिगु समायोजन यायेगु निर्णय याःगु खः ।
महानगरया नगर परिषद मूँज्यां उगु ऐन पारित यायेधुंका मंगलबाः दक्वः कर्मचारीपिनिगु छगू तह व स्तर बढुवा जूगु महानगरपालिकाया मू प्रशासकीय अधिकृत राजेश्वर ज्ञवाली जानकारी बियादिल ।
आः थ्यंमथ्यं १द्वः व ८ सः कर्मचारीपिनिगु छक्वलं बढुवा जूगु वय्कलं जानकारी बियादिल । ज्ञवालीया कथं महानगरय् ताःई निसें ज्याः यानाच्वंपिं कर्मचारीपिनिगु श्रेणीसियां संघपाखें नकतिनि भर्ना जूपिं कर्मचारीपिनिगु तह अप्वःसेंलि उगु श्रेणी बढुवाया माग जूगु व महानगरय् कर्मचारी समायोजनया खँ ब्वलंगु खः ।
आः संघपाखें ५दँ सेवा ई पूवंका शाखा अधिकृत महानगरय् ८, न्यादँ सेवा अवधि मगाःगु उपसचिव नवांै व ५दँ सिबें अप्वः सेवा अवधि पार याःपिं उपसचिव दशौं तहलय् ज्याः यानाच्वंगु दु ।
तर, महानगरय् २०दँ न्ह्यः भर्ना जुपिं कर्मचारी त आः नं ८गूगु तह जक जुयाच्वंगु हुनिं महानगरया कर्मचारीपिन्सं असन्तुष्टि न्ह्यब्वया वयाच्वंगु खः ।
थथे समायोजन धुंका दक्वः कर्मचारपिनिगु तलब भत्ता नं स्वतः अप्वईगु जूगु दु । थ्वः निर्णय नं महानगरपालिकाया लच्छिइ थ्यंमथ्यं ३० लखः थप वित्तीय भार अप्वःइगु खनेदु ।
कर्मचारी समायोजनं दँय् थ्यंमथ्यं ३ क्वःति ६०गू लखः ध्येबा अतिरिक्त भार अप्वःइगु जूगु दु ।
थ्वसिबें न्ह्यः महानगरय् नेपाल सरकारया सचिव प्रमुख प्रशासकीय अधिकृत जुइकथंया व्यवस्था दूगु खः । तर महानगरपालिकाया मेयर विद्यासुन्दर शाक्यया असन्तुष्टि लिप सचिवया सट्टा सहसचविं हे प्रशासकीय अधिृकतया जिम्मेवारी वहन याइगु व्यवस्था याःगु खः ।
महानगरया कर्मचारीपिन्सं नं संघपाखें नकतिनि भर्ना जुया वःपिं कर्मचारी सिबें क्वःये च्वना ज्याः यायेत असहज जूगु धासें असन्तुष्टि तयावयाच्वंगु खः। मेयर शाक्यं कर्मचारीपिनिगु माग सम्बोधन यायेत समायोजनया योजना दयेकादीगु खः ।