माधवनारायण मेला यायेगु वा मयायेगु धइगु अन्योलया दथुइ सक्वया नारि खुसि थुगुसीया स्वस्थानी व्रत कन्हयसिने न्ह्यायेत्यंगु दु । श्री माधवनारायण स्वस्थानी व्रत  शालि नदी सुधार समितिं सक्वय् पत्रकार सम्मेलन यासें वइगु माघ १५ निसें लच्छि यंकया श्री माधवनारायण स्वस्थानी व्रत न्ह्याइगु जानकारी ब्यूगु दु ।

थुगुसी कोभिड महामारीया हुनिं भक्तजन तय्त धाःसा दर्शनया लागिं नारि खुसिइ फत्तले व ज्यु तल्ले मवयेत नं समितिं इनाप याःगु दु । पत्रकार सम्मेलनय् नवासें शंखरापुर नगरपालिकाया प्रमुख सुवर्ण श्रेष्ठं व्रतालुया स्वास्थ्य सुरक्षायात ध्यानय् तयाः दर्शनयालागिं सक्वय् मवय्त इनाप यानादिल । अवस्थाया ल्याखं मेला न्ह्याके मज्यूगु तर सरकारं दक्व खुल्ला याना बीधुंकुगु अवस्थाय् मेलादिके नं मछ्युंगु अवस्था दुगु मेयर श्रेष्ठं धयादिगु खः। ‘आःया अवस्थाय् पशुपतिनाथ लिसेंया दक्वं देगः अले स्कूल, सिनेमा हल दक्व हे न्ह्याय् धुंकूगु अवस्थाय् जिमिसं माधवनारायण मेला जक याय् मखु नं धाय्मछिं,’ मेयर श्रेष्ठया धापू खः ।

‘स्वास्थ्य सुरक्षायात नं ध्यानय् तयाः परम्परा नं ल्यंकेमाःगु दु, ज्युत्तल्ले मेलायानितिं सक्वय् झाय्मते, जिमिसं थुलि जक धाय्फु ।’ दर्शनया लागिं सक्वय् छुं भक्तजनत सक्व थ्यनेफुगु सम्भावनायात ध्यानय् तयाः सिन्हः व प्रसाद स्वयम् सेवकपाखें वितरण याय्गु यानाःतापाकं हे दर्शनया व्यवस्था ताःलाकेगु समितिया नायः मिजेन्द्रकाजी श्रेष्ठं धयादिल। अथे हे, पिनं वइपिनिगु नितिं मास्क अनिवार्य याय्गुलिसें स्यानिटाइजर, ल्हाःसिलेगु थाय्या व्यवस्था नं याय्गु नायः श्रेष्ठं जानकारी याकादिल । ‘जिमिस ंव्रतालुया स्वास्थ्यया उसाँय् यात अप्वः च्यूताः तयागु दु, व्रतालुपिन्त फत्तले पिनेया सम्पर्कं तापाकेगु जुइ’ नायः श्रेष्ठया धापू खः ।

कोभिड संक्रमणया जोखिम दथुइ न्ह्याय् त्यंगु स्वस्थानी व्रतया व्रतालुया स्वास्थ्य सुरक्षायात ध्यानय् तयाः समितिं थुगुसी थीथी नियम व मापदण्ड क्वःछ्यूगु दु । थुगुसी व्रतय् च्वनेत माघ १० गतेनिसें १२ गतेतक्कया स्वन्हु जकया मिति क्वःछ्यूगु दु । सिमित संख्याय् जक व्रतालु दुथ्याकेगु खँय् नं स्थानीययात प्राथमिकताय् तय्गु धाःगु दु । अथे हे, नां दर्ता याकूपिन्सं माघ १३ गते समितिं क्वःछ्यूगु थासय् पिसिआर वा एन्टिजेन परिक्षण याकेमाः । निमोनियाया लक्षण मदुगु प्रमाणित याइगु एक्सरे रिपोर्ट अनिवार्य याःगु दु । अथे हे, व्रतालुयात दर्शनार्थीतपाखें तापाकेत स्कर्टिङया व्यवस्था याय्गु नं समितिं धाःगु दु 

व्रतालुया च्वनेगु नितिं बाय्या व्यवस्थानं समितिं हे याइसा व्रतालुयात ग्वाहालि याय्त परिवार तक नं वय् मदइगु यानाः माःगु दक्वं ग्वाहालि व व्यवस्था समितिं हे याय्गु समितिया नायः श्रेष्ठं धयादिल। माःकथं समितिं हे परिवारलिसे सम्पर्क यानाःमाःगु समन्वय याय्गु नं समितिं न्ह्यथंगु दु । कोभिड संक्रमण सम्वन्धि सचेतना मूलक सुचं लिसेंया होर्डिङ बोर्डत थाय् थासय् तय्गु योजना समितिया दु । स्वस्थानी व्रतया बाखनय् उल्लेख यानातःगु नवराज ब्राम्हणया राज्य लावण्य देय्या रुपं सक्वयात नाला वःगु दु । लिसें चन्द्रावति कुतुं वनाः धीचिना च्वनीगु खुसि कथं सक्वया हे नारि खुसि अर्थात शालिनदि यात कयातःगु दु । परापूर्व कालय् पार्वतीं थ्व हे स्वस्थानी व्रतच्वनाः महाःद्यः वर चूलाकूगु धार्मिक विश्वास समाजय् दयाच्वंगु दु ।

Categorized in राष्ट्रिय