ख्यालिजुजु मदनकृष्ण श्रेष्ठ च्यान्हु लिपा यलया भैंसेपातिइ च्वंगु मेडिसिटी अस्पतालय् कोरोना कोभिड १९ भाइरस संक्रमणमुक्त जुया शुक्रवाः छेँ लिहांगु दु ।

अस्पतालं डिस्चार्ज जुयाः छेँय् लिहाँ वयेधुंकाः ख्यालिजुजु श्रेष्ठं छगू भिडियो थःगु फेसबुक पेजय् पोष्ट यानाः थः अस्पतालं डिस्चार्ज जूगु जानकारी बियादीगु खः ।

ख्यालिजुजु श्रेष्ठ अस्पतालं डिस्चार्ज जूसां नं बल्लाःगु मदुनि । न्वःवायेत हे थाकुया च्वंगु दु । वय्कलं सार्वजनिक यानादीगु भिडियोलय्, ‘थ्व कोरोनां यानाः अतिकं कमजोर यात म्हगःयात, अतिकं यात, जिन्दगीइ गुबलें भोगे मयानागु भोगे याकल । न्हापाया कोरोनां इमिन्युटी पावर जिरो, व इनर्जी पावर दूगु अनुभव याना ।

आः जूगु कोरोना जिं ठ्याक्क अःखः जूगु अनुभव याना । छाय् धाःसा आःया कोरोनां इनर्जी पावर जिरो यात, इमिन्युटी पावर छुं मजूथें महसुस जुल, म्हगः दुने शक्ति हे मदु । प्लेटया नसाज्वलं नयेत चम्चा तकं ल्हाःतं ज्वनेमफूगु स्थिति ।’ धका धयादीगु खः। वयकलं थः जक मखु, छेँजःया न्याम्हं दुजःपिं काय् यमनलिसें भौ, म्ह्याय् सराना व छय् तकं कोरोना संक्रमित जूगु खः ।

थः सकल छेँजः हे थ्व इलय् कोरोना संक्रमित जूगु खँ न्ह्यथनादीगु खः। ‘जिगु न्याम्हं हे छेँजःयात कोरोना जुल । न्हापाया कोरोनां छम्ह छम्हेसित जक ज्वनीगु जुयाच्वन, आःया कोरोनां ला सकल छेँजःयात झ्याप्प याइगु जुयाच्वन । सुनां सुयात वास्ता यायेगु स्थिति मन्त, सुनां सुयात क्वाःलः दायेकाः त्वंकेगु स्थिति मन्त, सुनां नसाज्वलं ज्वरे यायेगु, व अवस्था नं मन्त ।

जि च्यान्हु अस्पताल च्वनावया । नुगः नुगः दुने भगवान दुपिं जलाखलापिं दयाः जिं थःत अतिकं भाग्यमानी तायेकाः । जलाखला दाजुकिजा तःकेहेँपिन्सं जिगु छेँजःयात साःसाःगु नकेत्वंके यानाः ग्वाहालि यात ।

सकलसित दुनुगलंनिसें कृतज्ञता प्वंकाच्वना । थथे हे जुइमाः, देय् न्यंकं थुज्वःपिं जलाखलाथें जाःपिं दयेमाः, छम्हेस्यां मेम्हेसित माया याइपिं, छम्हेस्यां मेम्हेसित मतिनाया मिखां स्वइपिं । थथे जूसा संसार सुख जुइ, संसारयात सुख यायेनु ।’ 

Categorized in राष्ट्रिय