व्यवसायीपिन्त सहुलियत बिइगु नीति कार्यान्वयन यायेत अर्थमन्त्रीयात ध्यानाकर्षण
लहनान्युज | पोहेलाथ्व तृतीया ११४१, माघ ३ सनिवाः
![](https://www.lahananews.com/sites/default/files/yalac.jpg)
ललितपुर चेम्बर अफ कमर्श नं कोरोना महामारीपाखे प्रभावितपि व्यवसायीपिन्थ थकायेगु लागि मौद्रिक नीति मार्फत सहुलियत बिइगु योजना कार्यान्वयन मजुगुलि अर्थमन्त्रीया ध्यानाकर्षण याःगु दु। चेम्बर अफ कमर्शं थौं शनिवाः न्हापागु वार्षिक साधारणसभामाया अध्यक्ष पुष्परत्न शाक्यं अर्थमन्त्री विष्णु पौडेलयात उगु ध्यानाकर्षण यानादीगु दु।
‘मौद्रिक नीति मार्फत सहुलियत बिइगु निर्णय दस्तावेजय् हे सीमित जुया च्वंगु दु। निर्णय कार्यान्वयन मजुया उगु नीतिपाखे व्यवसायीपिन्स लाभ काये फयाच्वंगु मदुनि।’ धका अध्यक्ष शाक्यं धयादीगु दु। यलय् अन्तरनिहित आर्थिक सम्भावनायात मूर्त रुप बिइत राज्यं ध्यान बिइमाःगुलि अध्यक्ष शाक्यं बःबियादीगु दु । ‘राज्यया ध्यान मवगुलि संस्कृति संरक्षणयात पर्यटन उद्योगनाप मस्वागुलि, हस्तकला शहरया रुपय् विकास यायेत, दक्षिण यलय् कृषि व रोमाञ्चकारी पर्यटकीय गन्तव्य थायया रुपय् विकास यायेगु लगायत सम्भावनापिनिगु मूर्त रुप काये फयाच्वंगु मदुनि ।
उगु ज्याझ्वलय् अर्थमन्त्री पौडेलं चेम्बर अफ कमर्श ल्ह्वःगु विषयय् निरन्तर सहलह याना वयाच्वनगु दु धाःसे देय् या आर्थिक विकासया लागि सहकार्य याना न्ह्यने वनेत सरकार तयार दुगु धकाधयादीगु दु। अर्थमन्त्री पौडेलं छिकपिन्स ल्ह्वनादीगु मुद्दा व न्ह्यसः गम्भीर खः । थुकिया कार्यान्वयनया लागि निरन्तर सहलह याना न्ह्यने वनेत सरकार तयारदु धका धाःगु दु । सहकार्यया लागि अर्थ मन्त्रालयया लुँखा न्ह्यावलय् चाइ धका धयादीगु दु।
ज्याझ्वलय् नेपाल चेम्बर अफ कमर्शया केन्द्रीय अध्यक्ष राजेशकाजी श्रेष्ठं सरकारं समृद्ध नेपाल व सुखी नेपालीया नारा न्ह्यने हःगु कथं शान्ति सुरक्षा, लगानीमैत्री वातावरणया सुनिश्चितता मजुगु व लिपागु पटक कोरोना याना अधिकाशं व्यवसाय धराशायी जुगु दु धका धयादीगु दु। उगु ज्याझ्वलय् राष्ट्रिय उपभोक्ता मञ्चया अध्यक्ष प्रेमलाल महर्जन, प्रमुख जिल्ला अधिकारी ढुण्डीप्रसाद निरौला, वरिष्ठ उपाध्यक्ष निरु थापा, महासचिव सुविन बज्राचार्य लगायतपिन्स चेम्बर अफ कमर्श नं निर्वाह याना वयाच्वंगु विविध भूमिकाय् केन्द्रीत जुया थःथःगु नुँगः खँ तयादीगु खः।
शाक्यया हे अध्यक्षताय् २१ सदस्यीय न्हगु कार्यसमिति
थौं जुगु साधारणसभां पुष्परत्न शाक्यया अध्यक्षताय् २१ म्ह न्हगु कार्यसमिति ल्यःगु दु। स्वदँया लागि थुगु कार्यसमिति ल्यःगु दु।
उगु कार्यसमितिइ वरिष्ठ उपाध्यय् निरु थापा, उपाध्यक्ष राजेन्द्रमान कायष्ठ, द्वितीय उपाध्यक्ष अनिलवीर बज्राचार्य, महासचिव सुविन बज्राचार्य व कोषाध्यक्ष नरेन्द्र शाक्य, सचिव हरिहर अधिकारी व सहकोषाध्यक्षय् प्रेमलाल महर्जन ल्यःगु खः।
अथेहे दुजलय् तेजेन्द्रगोपाल श्रेष्ठ, वीरेन्द्र शाक्य, ऋषिकेश तिमल्सीना, रामचन्द्र क्षेत्री, श्याम तण्डुकार, सुनिता बज्राचार्य, सुमित्रा खड्का, अविनाश कार्की, सविता सिंह, प्रवीणबहादुर शाक्य, अभिषेकराज बज्राचार्य, हरेराम जोशी व हेमकिशोरपि ल्यःगु खः । उगु सभां सविता सिंहया संयोजकय् मिसा चेम्बर व प्रवीणबहादुर शाक्यया संयोजकत्वय् युथचेम्बर अफ कमर्श गठन याःगु दु।
Categorized in राष्ट्रिय