रघुजी पन्तविरुद्ध कोमल वली अदालत वनिगु
लहनान्युज | सिल्लागा पारु ११४१, फागुन १६ आइतवाः
अमर्यादित टिप्पणी याना थःगु मानमर्दन याःगु धासें राष्ट्रियसभा दुजः कोमल वलीं नेकपा नेता रघुजी पन्तविरुद्ध मानहानीया मुद्दा दायर याइगु जूगु दु ।
नेता पन्तं थःगु तुती क्येंगु भरय् केपी ओलीं कोमल वलीयात सांसद दयेकूगु टिप्पणी यानादिगु खः ।
छगू ज्याझ्वलय् पन्तं कोमल वलीं पर्सी थकाना तुती क्यना ‘पोइला जान पाम’ धायेवं ओलीं वय्कयात केन्द्रीय दुजः व राष्ट्रिय सभा दुजः दयेकूगु धयादिगु दु ।
‘पोइल जान पाम धायेवं वयेक सांसद ला जुल तर सं तुइका च्वंपिं पार्टीया बुरीपिन्त छुं मन्त’ पन्तया धापू खः ।
पन्तया थज्यागु धापूतिं थःगु मानमर्दन जूगु धासें वली अदालत वनेगु तयारी जूगु धाःगु दु ।
थुखे वलीं, ‘नेकपाया नेता रघु पन्तं मिसापिन्सं तुती क्येना दूगु पद धकाः अभिव्यक्ति ब्यूगु दु, वय्कया मानव विकासया झ्वलय् दइगु तन्तु त बिचय् हे लिकुंगु थें च्वं’ वलीं सामाजिक सञ्जालपाखें लिसः प्वंकादिगु खः ।
वय्कलं, ‘विवेकहीन मनुतय्गु कुँखिनमं थःयात हे बाँमलाइगु । थज्यागु मनुतय्सं नेतृत्व याःगु राजनीतिक पार्टी व समाज याकनं हे दुर्घटना जुई’ वय्कलं धयादिल ।
वलीं थःथवे सम्मान मयातले समाजय् न्याय, समानता व विवेकशीलताया अन्त जुइगु नं धयादिल ।
