पलेस्वांपुखुलिइ चांचां डोजर
डंगोल | पोहेलाथ्व षष्ठी ११४१, माघ ६ मंगलवाः
![](https://www.lahananews.com/sites/default/files/kamalphokari.jpg)
पुरातत्व विभागया निर्देशन अःखः सिमसार पलेस्वांपुखुलिइ चांचां डोजर न्ह्याकाः जैविक ध्याचः लिकाःगु दु ।
येँ महानगरपालिकां वंगु चान्हय् चा लिकनाः भुइजःसिइ यंकूगु दु । येँ महानगरपालिका वडा नं १ य् दुगु पुखूया मौलिकता न्हंकाः क्षेत्रफल लिकुंकेत्यंगु धासें स्थानिय मनूतय्सं असन्तुष्टि क्यंगु दु ।
महानगरं पुखूयात कंक्रिटया संरचनाय् हिलेत्यंगु धासें अन्यागु ज्या मयायेत धागु खः । ज्या दिकेत पुरातत्व विभागं म्हिगः महानगरयात पत्र च्वःगु खः ।
पोखरी निर्माण प्राचीन स्मारक संरक्षण ऐन २०१३ या परिधिदुने च्वनाः ज्या यायेत पुरातत्व विभागं महानगरयात पत्र च्वःगु खः ।
अथेखःसां पुरातत्व विभागया निर्देशनयात वास्ता मयाःसें मध्यचान्हय् डोजर न्ह्याकाः पुखूया जैविक चा लिकाःगु दु ।
चा लिकायेगु ज्या मदिकेवं मध्यचान्हय् अभियन्ता व सञ्चारकःमित सम्बन्धित थासय् थ्यंकूगु दु ।
Categorized in राष्ट्रिय