भारतपाखेया २२गू नाका बन्द यायेगु सीसीएमसीया निर्णय
चौलागा पंचमी ११४१,बैसाख १८ सनिवाः
कोरोना रोकथाम तथा नियन्त्रण यायेत गठन जूगु निर्देशक समितिं निषेधाज्ञा लागु जूगु जिल्लाय् थप कडाइ यायेगु निर्णय याःगु दु ।
म्हिगः सिंहदरबारय् च्वंगु मुँज्यां भारतपाखे चाःगु ३५गू मध्ये १३ गू नाका जक सञ्चालनय् हयेगु निर्णय याःगु दु । ल्यं दुगु २२ गू नाका पूवंक बन्द यायेगु निर्णय याःगु दु ।
अथेहे मुँज्यां निषेधाज्ञा लागु जूगु जिल्लाय् ४ब्वय् छब्व कर्मचारी तया ज्याकु न्ह्याकेगु निर्णय याःगु दु । थुगु निर्णय नापं सरकारी ज्याकु व बैक वित्तिय संस्थाया म्हो जक ज्याकु चालिइ ।
सरकारं क्वारेन्टाइनलिसें चकं दूगु नाकात काँकडभिट्टा, जोगमनी, पशुपतिनगर, भिठ्ठामोड, गौर, वीरगञ्ज, वेलहिया, कृष्णनगर, जमुनाहा, झुलाघाट, कोलुघाट, गौरीफन्टा व गड्डाचौकी दु ।
अथेहे मुँज्यां संघीय मन्त्रीयात प्रदेश समन्वय यायेगु याना खटे यायेत मन्त्रिपरिषदयात सिफारिस नं याःगु दु । थुकिया नापं मुँज्यां सार्वजनिक निर्माणया फुक्क ज्या बन्द यायेगु नं निर्णय याःगु दु ।
यदि निर्माण ज्या सुचारु यायेगु जूसा कामदार कर्मचारीतयेत निमार्ण लागाय् हे तयेमाः । उद्योगत सञ्चालन यायेगु जूसा मजदुर, कर्मचारीयात उद्योग परिसर दुने हे च्वनेगु याना सञ्चालन यायेत निर्देशन नं बिउगु दु ।
मुँज्यां नीजि अस्पतालतयेत कोभिड अस्पतालया कथं छ्यलेगु तयारी न्ह्याकेगु निर्णय नं याःगु दु । विदेशं नेपाल वःपिं विदेशीं क्वारेन्टाइन च्वनेत अनिवार्य यायेगु व नालामकाःसा डिपोट यायेगु नं निर्णय याःगु दु ।
क्वारेन्टाइनया कथं दूगु होटलयात थप ब्यवस्थित याइगु जूगु दु ।
Categorized in राष्ट्रिय
