रंगया नखः होली थौनिसें न्ह्यात
राम डंगोल | चिल्लाथ्व नवमी, ११४१, चैत्र ८ आइतबाः
रंगया नखः होली थौनिसें विधिवत कथं न्ह्यागु दु । येँया वसन्तपुलिइच्वंगु गद्दी बैठकया दक्षिणपाखे होलीया चीर स्वायेधुंका देय्यंक होली नखः न्ह्याइगु मान्यता दु ।
चन्द्रमास अन्तर्गत् फाल्गुन महिनाया पुन्हि कुन्हु हनिगु होली थुगुसिइ स्वानिगः व पहाडी लागाय् चैत १५ गते हनेत्यंगु दु । तराईलय् धाःसा चैत १६ गते होलीया विशेष हर्षाेल्लास कथं हनि ।
वसन्तपुलिइ चीर स्वायेन्ह्यः पशुपतिया गोरखनाथया द्यगःलय् पृथ्वीनारायण शाहया गुर्जु पल्टनं सलामी बिया मयलया सीमाया शिर द्यःछाना पशुपति नाथय् मयलया कचा छायेगु चलन दु ।
बाजंगाजं नापं पशुपतिनाथं उगु पल्टन हनुमान ढोकाय् थ्यनेधुंका भिं साइतय् वसन्तपुलिइ थ्यंमथ्यं ३०गू फिट तःजाःगु चीर स्वायेगु याः ।
रंगीचंगी कापःतं चिनातःगु ३गू छत्रया चीर फागुन शुक्ल पुन्हिया चान्हय् तिन्ख्यःलय् यंका छ्वयेकेधुंका होली नखः क्वचाइगु याः ।
