श्री हल्चोक आकाश भैरव
नृपेन्द्रलाल श्रेष्ठ | ञंलाथ्व एकादशी ११४४, भाद्र २९ शनिवाः
नेपालय् थीथी जात्रापर्व, नखः चखः तजिक हनिइगुलि नखः मध्ये येँया जात्रा छगु न खः। येँया जात्राय् न नेवाः समुदायपाखे थीथी जात्रा हनिइगु याइ। अथेहे, स्वनिगलय् नेवाःतय्गु तःजिगु जात्रा मध्ये छगू येँयाः जात्रा खः। थुगु जात्रा येँ, यल व ख्वपय् बिस्ककथं हनेगु याइ।
येँया जात्राय् मू आकर्षण कुमारी, भैरव व गणेशया रथ सालिइगु न खः। अथेहे श्री हल्चोक आकाश भैरव, लाखे व पुलिकुसिया जात्रा न आर्कषण खः। येँया जात्राय् पिहावइगुलि श्री हल्चोक आकाश भैरव हल्चोकया नेवाः दुने पुतुवार समुदायपिन्स पिकायेगु याइसा लाखे मजिपातया रजितकार व पुलिकुसि किलागःया ज्यापू समुदायपिन्स पिकायेगु याइ।
येँया जात्रा सुरु धाःसा ञंलाथ्व द्वादशिनिसे अनौपचारिक कथं न्ह्याइ । ञंलाथ्व द्वादशि हनुमानध्वाखाय् यःसिं थनिइगु याइ । येँयाः इलय् हलिमय् जीवित द्यः कथं कयातःम्ह श्री कुमारी माजु, श्री गणेद्यः व श्री भैलःद्यःया रथयात्रा स्वन्हु यंकं जुइगु खः। उकिया नापनापं पुलुकिसि, लाखे, दीप्याखं, महाकालीप्याखं वश्री हल्चोक आकाश भैरव द्यःया जात्रा नंखः।
येँयाः बलय् याइगु जात्रा खः श्री हल्चोक आकाश भैरव जात्रा। श्री हल्चोक आकाश भैरवयात येँय् च्वंपिन्सं सवः द्यःनाप सवःभक्कु नं धाय्गु याः। आकाश भैरव नापं चण्डी व कुमारी यानाः स्वम्हद्यः दइ ।
श्री हल्चोक ्आकाश भैरवया जात्रा गबलें निसें न्ह्याःगु खः धका ठोस प्रमाण मदुसा नं नेपाल सम्वत १०७ इलय् जुजु ग्ुणकामदेवं न्ह्याकूगु धइगु अनुमान यानातःगु दु । जुजु गुणकामदेवयात महालक्ष्मी द्यवं दर्शन ब्यूगु खः । द्यःया उजं कथं थःगु राज्ययात शत्रुया भयपाखे मुक्त यायेत हल्चोकय् श्री आकाश भैरव सहित थीथी द्यःत तान्त्रिकबिधिपाखे उत्पन्न याःगु धइगु बंशावलीइ च्वयातःगु दु । जुजु गुणकामदेवं येँय् रक्षायाय्गु नितिं प्यखेर अष्टमातृका स्थापना यानाः थीथी थासय् भैरव नं स्थापना याःगु किंबदन्ति दु । हल्चोक आकाश भैरवया झिनिदँया जात्रा धाःसा जुजु अमर मल्लं न्ह्याकूगु धइगु बंशावलीइ न्ह्यथना तःगु दु ।नेवाः परम्परा कथं अष्टमातृका व भैरवया तःधःगु महत्व दु ।
नेवाःतसें माने याइगु पञ्चतत्व मध्ये छगू वायु नं खः । श्री हल्चोक आकाश भैरव द्यःयात वायु कथं नं काय्गु याः । आः नं सुं यात फसं कयाः समस्या वल धाःसा हल्चोकय् वयाः पुजा यायेगु यानाच्वंगु दु । नेपाःया राजकीय सम्मान कथं प्याखं ल्हुइकेगु छगू हल्चोकया आकाश भैरव नं खः । न्हापा न्हापा जुजुपिन्सं दिगु द्यः कथं हल्चोक आकाश भैरव द्यःयापुजा नं याः ।
ञलाथ्व एकादशि कुन्हु हल्चोकया द्यःछेँ न्ह्यःने छगू बिशेष पुजा जुइ । अन झिनिदँ जात्राया द्यःपिनिगु ख्वाःपाः झिम्ह द्यःश्री हल्चोक आकाश भैरव, चण्डी, कुमारी, पार्वती, गंगा, महाद्यः, बाराही, आकाशदेवी, दक्षिणकाली व महाकालीया ख्वाःपाःया बिशेष पुजा जुइ । श्री आकाश भैरव द्यः द्धादशी कुन्हु न्यतया काय्गःननिइ पिहावइगु याइसा श्रिी आकाश भैरव द्यःगथे यानाः थन द्यः लाः वल धइगु न्ह्यथना तःगु मदु ।
श्री आकाश भैरव द्यःया वँचुगु ख्वाःपाः, वँ चुगु जामालिसें ल्हातय् खड्ग दइसा चण्डी व कुमारीपिनि ह्याउँगु ख्वाःपाः व ह्याउँगु जामा फिनाः पिहां बिज्याइ । काय्गः ननिइ द्यः पिहां बिज्याइ बलय् दकलय् न्हापां चिलाख दइसा अनं लिपा चण्डी, कुमारी व हल्चोक आकाश भैरव धुंकाः बाजं पिहांवइ । द्यः पिहां बिज्याय् धुंकाः दकलय् न्हांपाउगु ननिइ द्यःप्याखं ल्हुइ न्ह्यः द्यः ल्हाय्माः । द्यः ल्हाय्गु इलय् स्वम्हं द्यःप्याखं हुली । अन लिपा चण्डी व कुमारी निम्ह द्यः प्याखं हुलीसा लिपा भैरव याकचाः प्याखं हुली । वया लिपा छचाः चाःहिलाः हाकनं काय्गःननिइ हे वयाः क्वचाय् की । क्वचायेकीगु इलय् नं द्यः ल्हाइगु खः ।
न्हापा न्हापा श्री हल्चोक आकश भैरव द्यःयात येँयाः जात्राया झ्वलय् हनुमानध्वाकाया नासः चुकय् मेय् बिइगु न याः। २०४६ साल लिपा मेय् बिइगु धाःसा बन्द जुगु दु।
येँयाःया लिपागु दिं ञलागा तृतिया कुन्हु काय्गःननिइ हे द्यः पिहांवयाः छचाः चाःहिलाःहाकनं लिहां वइ । उगु दिनय् उगु छेँथुवाःपाखें स्वम्ह द्यःयात बिशेष पुजा यानाः बिदा यिबा हइ । जात्राया लिपांगु दिनय् लिहां वय्गु इलय् स्वम्ह द्यःपिनिग ुख्वाःपाः व लं पुनाः हे लिहां बिज्याइ । लिहां बिज्याइगु इलय् पुजा काकां हल्चोकया द्यः छेँय् वइ । द्यःछेँय् पुजारीं लसकुस यानाः स्वम्ह द्यःपिन्त दुकाय् धुंकाः जात्रा औपचारीक कथं क्वचाइ ।
द्यः प्याखंहुलीगु झ्वलय् चण्डी व कुमारी निम्ह छक्वलं प्याखं हुलीसा श्री हल्चोक आकश भैरव याकःचा प्याखं हुलीगु खः । बाजं कथं खिं छगः व झ्यालि निगू दइ । बाजंया ताल झिन्नाले सिन्तांगया बोलय् बाजं थाइ ।
