निर्वाचन आयोगं मतदाता नाँ धलः प्रकाशन यात
चौलाथ्व पंचमी ११४१, चैत्र ५ बिहीवाः
लिपांगु अद्यावधिकपाखें देशय् छगू क्वःति ६२ गू लख ४३ द्वः सच्छि व १०म्ह मतदाता कायम जूगु दु ।
वंगु माघ १५ गते निसें न्ह्यागु मतदाता नाँ धलः अद्यावधिक व मतदानस्थल अले मतदान केन्द्र पुनरावलोकन ज्याझ्व क्वचागु नापं मतदाताया लिपांगु नाँ धलः प्रकाशन याःगु खः । देय्यंक १० द्वः ६सः व ६०गू मतदानस्थलय् आबद्ध याना लिपांगु मतदाता नाँ धलः प्रकाशन जूगु निर्वाचन आयोगं जानकारी बिउगु दु ।
आयोगपाखें वंगु पुस ५ गते तक्क मतदाता नाँ धलःखय् नाँ दर्ता याःपिं व उगु हे मिति तक्क १८ दँ वैंश पूवंपिं मतदाताया नाँ अद्यावधिक याःगु दु । मतदाता नाँ धलः ऐनय् ‘निर्वाचनया मिति घोषणा जुइधुंका उगु निर्वाचनया प्रयोजनया नितिं मतदाताया नाँ धलःखय् दर्ता जुइ मखु ’ धइगु व्यवस्था कथं वंगु पुस ६ गते निसें स्थगन याःगु खः ।
आयोगया कथं स्थगन जूगु मतदाता नाँ संकलन लिसें अद्यावधिकसम्बन्धी ज्या आः थौनिसें ७७गू हे जिल्ला निर्वाचन ज्याकुपाखें मतदाता नाँ संकलन लिसें अद्यावधिकसम्बन्धी ज्या संचालन जुइत्यंगु दु ।
Categorized in राष्ट्रिय
